Shillong, K’Lyngkot 04
Ka Meghalaya Residents Safety and Security (Amendment) Bill, 2020 (MRSSAB) kan sa shu ïap hi noh kumto hadien ba ka tnad kam pohïing ka Sorkar Pdeng (MHA) ka la ai jingmut ïa ka Sorkar Jylla ban thaw da kawei pat ka sienjam, da kaba kdew ba kane ka ‘Bill’ ka ïatyngkhuh bad ki aiñ ka Sorkar Pdeng kiba khmih ïa ki mat bapher-bapher hapdeng ki Jylla.
Kane ka jingpynkylla ka la thmu ban wanrah ïa ki ‘Facilitation Centre’ (jaka rung jaka mih) hapoh ka Meghalaya Residents Safety and Security Act, 2016 (MRSSA) na bynta ban peit bniah ïa ka jingwan rung kyrthep ba khlem sangeh shapoh ka Jylla.
Katkum ka jingong u Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong, ka Sorkar Jylla ka la tyrwa ban wanrah jingkylla ha ka MRSSA, 2016 namarba ka duna haba phai sha ki kyndon ban pynïeng ïa ki jaka rung, jaka mih.
“Haba la tynjuh ïa ka (rai jong ka Sorkar) ha Ïingbishar, ka Ïingbishar ka la pyndam noh ïa ka, kaba pynlong pat ïa ngi ban saiñdur ïa ka Meghalaya Residents Safety and Security (Amendment) Bill, 2020,” u la ong da kaba bynrap, “U Lat barim, u Tathagata Roy u la phah ïa kane ka ‘Bill’ sha ka tnad kam pohïing ka Sorkar Pdeng na bynta ka jingkhmih bniah. Ka tnad ka la pynphai biang, da kaba ai jingmut ïa ngi ban wad da kawei pat ka sienjam naba ka jingpynkylla ka ïatyngkhuh bad ki aiñ ka Sorkar Pdeng halor ki mat ba ïadei hapdeng ki Jylla. Lada ngi dei ka Jylla kum ka Manipur, ha kaba ka leit ka wan kam donkam ban ïaid lyngba ka Assam, Barak Valley, Tripura, lane Mizoram, ka ‘Bill’ ka lah ban ïoh ïa ka jingmynjur. Namarba ka jingpynkylla ka ïatyngkhuh bad ki aiñ ka Sorkar Pdeng, ym lah ban pyntreikam ïa ka.”
“Shisien ba ka ‘Bill’ kam ïoh ïa ka jingmynjur jong u Lat, ka ïap la ka ïap noh hi kumto,” la pynskhem u Bah Tynsong.
U la pyntip, “Mynta, ngi treikam katkum ka MRSSA jong u 2016, kaba pynleit jingmut thik tang ïa ki nongshong wai bad kam don kino-kino ki kyndon na ka bynta ki jaka rung bad jaka mih. Kumta, ka Ïingbishar ka la pyndam noh ïa ka rai jong ka Sorkar ban thaw ïa kum kine ki jaka.”
Shuh shuh, u Symbud Myntri Rangbah u la kdew ba ka Sorkar barim hapoh ka jingïalam u Dr. Mukul Sangma ka la leh bakla da kaba pynrung ïa ki kyndon ‘Entry-Exit’ tang ha ki kyndon (Rules), bad ym ha ka aiñ ba kongsan (Principal Act). Kane ka la pynlong ïa ka aiñ kum ka bym pat biang bad kaba lah ban shah bishar ha ka Ïingbishar.
“Ka MRSSA kaba la don lypa (2016) kam pat biang; kan jyn da la kham bha ban ai kyrteng ïa ka kum ka ‘Tenants Bill’ namarba ka ïadei beit thik tang bad ki kam jong ki nongshong wai. Ki bor synshar barim ki la pyrshang ban ïalam bakla ïa u paidbah da kaba pynrung ïa ka kyndon ‘Entry-Exit Point’ tang ha ka ‘Subordinate Legislation’ watla ka aiñ ka jar-jar halor kane ka bynta,” u la ong.
