Mexico, Kyllalyngkot:
U jumai uba 6.5 Magnitude ka jingkhlaiñ, u la pynkhynñiuh ia ka nongbah jong ka Mexico ha ka Sngi Thohdieng, ha kaba 2 ngut ki la duh noh ia ka jingim ha katei ka sngi bad bun tylli ki iingsah briew ki la julor ha kawei na ki shnong kaba la shah ktah jur bha na utei u jumai ha katei ka sngi.
Ka US Geological Survey, ka iathuh ba katei ka jingkhie jumai, ka la jia tang khyndiat por shuwa ka por 8:00 baje mynstep, hajan Acapulco, kaba dei ka kad lieng kaba heh bad ka jaka jngohkai pyrthei.
Ia utei u jumai, la iohsngew kumba 400 Kilometre (250 mile) na ka phang Mihngi jong ka nongbah Mexico, ha kaba ki bor pyniaid ki la bthah ia ki paid nongshong shnong ban phet bad mih sha ki surok ban lait na ki jingma kiba khraw bad kiba ap ia ka jingim jongki na ka jingtwa bad jing julor ki iing- ki sem bad ki jingtei kiba don hajan jong ki.
Uwei u rangbah uba la 60 snem ka rta u la khlad noh hadien ba u la hap katba u dang pyrshang ban phet shabar na ka iing jong u kaba don ha ka mala kaba ar ha ka nongbah, la iathuh ki bor pyniaid shnong.
Ki 12 ngut kiwei pat ki la mynsaw, ong ka nongialam jong ka nongbah, ka Clara Brugada, ha ki jingpynbna ha ki rynsan ‘Social Media’, tangba ym shym la don kano kano ka khubor, ba ki don ki jingjulor kiba jur ha katei ka nongbah kaba heh tam jong katei ka ri.
Ka President Claudia Sheinbaum ka la shah pynbor ban pynkynriah noh na ka iing President ha ka por ba ka ju pynlong ia ka jingialang bad ki nongthoh khubor kaba man ka step.
Ka tnat National Seismological Service jong ka Mexico, ka iathuh ba ka jaka ba utei u jumai, u la khynñiuh na ka thaiñ kumba 14 kilomitar ka jingjngai shaphang Shathie Lam Mihngi jong ka nongbah San Marcos, kaba don ha ka Jylla Guerrero.
Kawei ka kynthei kaba don ha ka rta kaba sanphew snem ka rta “ka la duh noh ia la ka jong ka jingim haba ka iing jongka, ka la twa halor jong ka”, la ong ka Lat ka Guerrero, ka Evelyn Salgado.
U Mayor jong ka San Marcos, u Misael Lorenzo Castillo, u iathuh ba kumba 50 tylli ki iing ki la shah pynpra bad “baroh ki iing ki don ki jingtwa.”
Ki nongshong shnong ki la pyni ia u nongthoh khubor ia ki jingtwa ha ki kynroh jong ki iing jong ki bad ki bynta jong ki kynroh kiba la twa.
