Chennai, Kyllalyngkot:
U J C D Prabhakar, uba la long MLA la ar sien bad u heh nongïalam uba la pynïasoh ïalade bad ka seng AIADMK naduh ka por jong ka jingsynshar jong u M G Ramachandran, u la ïasohnoh bad ka seng Tamilaga Vettri Kazhagam (TVK) ba la ïalam da u khlur ak phlim u Vijay ha ka sngi Thohdieng.
U Prabhakar u la ïakynduh ïa u Vijay ha ka ïingsah jong u ha Pattinapakkam bad u la pynrung kyrteng ïalade ha ka seng. U Prabhakar u la shah jied na Villivakkam Assembly konstitwensi arsien, kata ha u snem 1980 bad 2011.
Ka jingpynrung dkhot ïa u Prabhakar ka long hadien katto katne bnai ba u la pynkut noh ïa ka jingïadei bad ka seng AIADMK ba la ïalam da u O Panneerselvam hadien ka jingbym lah ban leh bha jong ka seng AIADMK ha ka ilekshon Lok Sabha ba la dep.
U Panneerselvam u la ïakhun kum u riew shimet ryngkat ka jingkyrshan jong ka NDA.
Hadien kata, ka kynhun ki nongkyrshan jong u ba la ïalam da u Prabhakar ki la mih noh na katei ka ktem bad ki la pynbna ban thaw ïa ka AIADMK Coordination Committee, kaba thmu ban wad ki lad ki lynti ban pynïasoh biang ïa ki kynhun ba ïaleh pyrshah jong ka seng.
Ka jingleit jong u Prabhakar sha ka TVK ka pyni sa kawei pat ka jingpynrung dkhot kaba kongsan na ka por jong u MGR, hadien ba u heh nongïalam u K S Sengottaiyan, u la pynpaw ïa ka jingsngewtynnat kaba nangroi jong u Vijay hapdeng ki nongïalam ba la rim jong ka AIADMK bad pyndap ïa ka jingkhia ha ka saiñ hima sima ha ka seng ba dang thymmai ha shwa ka ilekshon sha ka Ïingdorbar Thaw Aiñ ha u snem 2026.
