Shillong, K’Lyngkot 04
U Bah Damewanhi L Rymbai, uba dei u President ka Voice of the People Party (VPP) East Jaiñtia Hills District u la ïathuh ba ka seng
ryngkat ki MDC ka VPP kin dang buddien ïa ka jingkular ka Sorkar ban siew dep noh ïa ka tulop ki nongtrei ka Jaiñtia Hills Autonomous District Council (JHADC).
Haba ïakren bad u Bah Damewanhi u la pynkynmaw ba ka jingïakhih ka VPP ha u bnai Nohprah ban khang ïa ka khyrdop jong ka Council ka dei hadien namar ki nongtrei ka JHADC kim ïoh ïa ka tulop haduh khyndai bnai.
U la ïathuh hadien ka jingïakhih, ka Sorkar ka la siew ïa ka tulop jong ki nongtrei na bynta shi bnai kaba la pynkmen ïa ki nongtrei namar ba la jan ka khristmas bad mynta kaba sah ka long sa phra bnai.
Shuh shuh u la ïathuh ba ka Sorkar ka la pynkylla ka jingtreikam namar ka JHADC ka la pdiang ban siew tulop da ka Sorkar kumta ki hap pynkylla ïa ka jingtreikam ban hap plie account bad kawei.
U Bah Damewanhi u la pyntip ba ha u snem thymmai ka Sorkar ka la kular ban siew dep noh ïa ka tulop ba dang sah sa phra bnai bad lada kam urlong ka VPP kan bteng biang ïa ka jingïakhih.
U la pynkynmaw ba ka jingslem ban pyllait ka Sorkar ïa ka bhah jong ka JHADC namar ki kot ki sla hap ïaid bun tylli ki tnad treikam, kane ka la pynsahkut ïa ka tulop hynrei mynta kan sa kloi ban ïoh tulop lada la siew da ka District Council Affair jong ka Sorkar Jylla.
U la ïathuh ruh ba ka JHADC mynta kan pynkhreh tang ïa ka mang pisa ban phah sha ka Sorkar ïa ka jinglut ban siew tulop sha ka DCA bad ka DCA kan sa siew beit ïa ka tulop sha ki nongtrei ka Council.
