Israel, Kyllalyngkot:
Kawei na ki kynthei nong Israel ba shah rahbor ha ki lehnoh Hamas naduh kabasdang jong ka thma ha u Risaw jong u snem 2023, ka Romi Gonen, ka la ong ha ka jingïakren bad ki lad pathai khubor, ba 4 ngut ki lehnoh Hamas, ki la batbor ïa ka, ha ki por ba ka la shah teh mraw haduh 15 bnai hapoh Gaza Strip.
“Ym don mano mano ba lah ban pynsngap jar ianga… Nga don hangne, nga la jop,” ong ka Gonen, 25 snem ka rta, ha ka jingïakren bad kitei ki nongthoh khubor ka Israel.
Ka Gonen, haba ka kren ha ka ktien Hebru, ka la ong “nga la mad ia ki bun jait ki jingshah leh khlem-akor bapher ha ka jingshah teh mraw ha ki 4 ngut ki shynrang bapher, kiba don ki jinglong ba jakhlia bad kiba ha rukom.”
Ka Gonen kaba la shah pyllait ha u Kyllalyngkot 2025 ha ka por ba don ka jingsangeh thma hapdeng ka Israel bad ka Hamas, ka la batai kumno shisien ka la shah thombor ha uwei na ki nongap pahara jongka ha ka kamra ba la set ia ka.
Ha kawei pat ka sngi, ka Gonen ka la ong ba u nongap u la bud ia ka sha ka paiñkhana.
“Bad dei hangta ba nga la shah batbor ha ka sien kaba lai”, ka la ong.
“Nga la ong ha lade: ‘Romi, baroh ki Israel ki pyrkhat ba phi la iap, haba ha ka jingshisha phin sa long ka mraw jong u ha ka kam shongkha shongman junom'”, ka la ong, da kaba ïathuh kumno ka la sngew ha kawei ka sngi hadien ka jingshah lehbeiñ.
Ka la iathuh kumno ha kawei pat ka por u nongleh beijot jong ka, uba shong ha ka shuki, u la peit ia ka bad kylli, “‘Romi, phi biang ne kumno?’.
“Nga shu kren halade, ‘Ko ‘riew khlem dohnud, kumno phi nud ban kylli ia kata?’.
“Bad nangta u wan shajan jong nga, u pyn’ap ia ka suloi na ka moi-moi jongnga bad u ong: ‘Lada phi pynpaw ia kane hangno- hangno, ngan pyniap ia phi.'”
Katto katne ngut ki nong Israel bad kawei pat ka kynthei kaba la shah set mraw ha Gaza bad hadien la pyllait noh, ki la phla ba ki la shah leh beiñ bad shah batbor kumjuh kumba long katei ka samla, mynba ki dang don ha ka kti ki lehnoh Hamas hapoh nongbah Gaza.
Ka kynhun lehnoh Islamist jong ka Palestine, ka Hamas, kaba ryngkat bad ki kynhun ba ïatreilang jong ka Palestine, ka la bat ïa ki nongshah rahbor ha ka por ba ka la thombor ïa ka Israel kaba khlem pat ju jia mynno mynno ruh ha ka 7 tarik u Risaw jong u snem 2023.
Na ki 251 ngut ki briew kiba la shah kem ha katei ka sngi, ki lehnoh ki la aiti lut ia baroh kiba la iap bad kiba dang im, lait noh tang ia ka met jong uwei u pulit Israel.
Ha u bnai ba ladep, ka kynhun iada ia ka hok longbriew manbriew- ka ‘Amnesty International’, ka la kynnoh ia ka Hamas bad kiwei ruh ki kynhun lehnoh jong ka Palestine ba ki leh ia ki kam runar pyrshah ia ka longbriew- manbriew, kynthup ia ka jingpynshitom beiñ, ka jingleh be-ijot bad kiwei de ki rukom leh be-aiñ ha ka liang ka shongkha- shongman”.
