Shillong, K’Lyngkot 04
U Lat ka Jylla Megha-laya u CH Vijayashan-kar u la ong ba ka jinglong nongïalam kam dei satia tang ka nam ne kyrdan, hynrei ban don ka jingkitkhlieh ha ka jinglong ba janai bad ka jingshakri ïa ka imlang sahlang.
Haba kren ha ka jingïakynduh lang ha ka 2 tarik Kyllalyngkot, u Lat u la ai khublei ïa ki nongmihkhmat (Delegates) kiba la shah jied ha ka national-level ban mihkhmat na ka Jylla Meghalaya ha ka Viksit Bharat Young Leaders Dialogue 2026.
U Lat u la ong ba ka jinglong nongïalam ba shisha kam dei eh tang ka bor, hynrei ka dei ka jingpynkupbor bad u la khot ïa ki samla ban long kiba don ïa ka jinglong kaba beit, kaba bniah bad kiba don ïa ka jingkut jingmut kaba skhem na ka bynta ka thong jong ki.
Nalor kata u la kyntu ïa ki samla ban pyndonkam hok ïa ka rynsan jong ka ri ban pynpaw ïa ki sap bad ban noh synñiang ha ka rukom kaba dei halor ka jingthmu jong ka Viksit Bharat. U la pynkynmaw ruh ïa ka khana jingjop jong ka samla Rifiness Warjri kaba dei ka dkhot NCC na Meghalaya, Kaba la kut jingmut bad treishitom kaba la poi sha kliar u lum ‘Everest’ dang ha ka rta kaba 20 snem.
U la ong ba, ka Jylla Meghalaya ka la ïoh ban mihkhmat arngut ha ka Viksit Bharat-Design for Bharat track, ki dei ki samla pule ka National Institute of Technology, Shillong, kata Nishant Kumar Singh bad ka Necharika Singh ki la shah jied ha ka national-level.
Ka jingpynwandur ïa ka ‘Smart Braille Watch’ ka dei ka tiar kaba la shna pynwandur kyrpang ban ïarap ïa ki briew kiba don jingduna ha ka bor ïohi ba kin tip ïa ka por bad ki jingpynbna lyngba ka tactile Braille output. Kane projek ka phai khmat sha ka jinglah ban thied ha ka dor kaba jem, kaba suk ban pyndonkam da kaba pynbeit ïa ki jingduna kiba ïadei bad ki tiar Braille kiba la don lypa. Ki nongpynwandur ïa kane mynta ki la don ha New Delhi ban pynkhreh pyni ïa ka projek jong ki ha ka rynsan jong ka ri ha ka jingïadon lang u Myntri Rangbahduh ka ri u Narendra Modi lem bad kiwei ki riew shemphang.
Ka Ashita Kar ka samla pule klas XI na East Khasi Hills District, Haba pynpaw ïa ki jingangnud ka la ong, “Kane ka dei ka sien kaba ar jong nga ban ïoh ïashimbynta ha ka National Youth Festival shibynta jong ka Viksit Bharat Young Leaders Dialogue. Ngan pyni ïa ka jingthmu bad ka jingïoh jong nga halor ka jingtei ïa ka kynhun treikam kaba la pynkhreh na ka bynta ka lawei jong ka Viksit Bharat, bad nga kyrmen ba yn pdiang bad pyntreikam ïa ki jingmut jong ki samla na kylleng ka ri na ka bynta ka Viksit Bharat 2047.”
U samla Akbarlang Synteng Nongdhar na East Khasi Hills u ban mih khmat ïa ka Meghalaya ha ka thup ‘Folk Dance’ u la pynpaw ïa ka jingkmen da kaba ong, “Nga sngew sarong ban ïoh mih khmat ïa ka Meghalaya hapoh ka ri. Kum ki samla ngi khmih lynti ïa ka jingïalam lynti bad kiwei ki lad ki kabu ban pynpaw ïa ka kolshor, ka pateng bad ki sap ki phong jong ngi ha ki rynsan jong ka ri.”
U Elbonson Marbaniang uba dei u Football Coach na Mawsynram, East Khasi Hills, u la ong, “Ngin ïashim bynta ha kaba pyni ïa ka jingshad tynrai ‘Ka Shad Mastieh’ ha New Delhi. Ngi kyrmen ban mih khmat ïa ka Meghalaya da ka jingsngew sarong bad ban pyni ïa ki sap ki phong ha khmat ki nongwan ïashim bynta ba na kylleng ka ri.”
Kiba shah jied na Meghalaya ban leit ïashimbynta sha ka Viksit Bharat Young Leaders Dialogue 2026 ki don haduh 25 ngut. Kine ki ‘delegates’ ki la shah jied lyngba ka rukom bapher-bapher kaba la sdang da ka Online Quiz ha baroh kawei ka ri ïa kaba la pynlong lyngba ka ‘My Bharat Portal’ ha u Nailur-Risaw 2025, ha kaba la sakhi kumba 50 lak ngut ki samla na kylleng ka ri ki la ïashimbynta.
La ong ba na Meghalaya kiba ïashim bynta ha ka Quiz ki don haduh 2,393 ngut, ha kaba 475 ngut ki la ïoh lad ban ïashim bynta ha ka Online Essay. Ki nongïashim bynta ba la shah jied ki la phah ïa ki Essay ba la pynshong nongrim halor ki shiphew tylli ki phang pdeng ba kongsan jong ka Viksit Bharat Challenge.
Hadien ka jingjurip bniah da ki riew shemphang katkum ka jingbthah ka Ministry of Youth Affairs and Sports, Government of India, 88 ngut ki samla na Meghalaya ki la poi sha ka bynta jong ka State Championship.
Ïa ka State Championship ba la pynlong ha ka 13 tarik Nohprah 2025, ha kaba ki nongïashim bynta ki la ïasam ïa ki jingmut jong ki lyngba ka PPT presentation ha khmat ki nongbishar kaba kynthup ïa ki riew shemphang. Ïa ka jingjied kaba khatduh ha ka ri la mynjur da u nongpyniaid ba la thung da ka Ministry hadien ka interview. Nalor kane ki don haduh 23 ngut ki samla na ka Jylla ki ban ïashim bynta ha ka Cultural Track, ha kaba kin pyni ïa ki jingrwai bad ki jingshad tynrai, katba lai ngut ki samla kin ïashim bynta ha ka declamation, poetry bad painting.
Ïa kine ki nongïashim bynta la jied napdeng ki 1000 ngut ki samla kiba la ïashim bynta ha ka State-level Chief Minister’s Youth Engagement Programme ba la pynlong ha NEHU campus naduh ka 2 haduh ka 5 tarik Nohprah 2025.
Ki samla kiba la shah jied kin ïoh ruh ban ïakren ïa u Myntri Rangbahduh Narendra Modi ha ka 11 tarik Kyllalyngkot 2026 ha ka National Youth Festival.
Ka Viksit Bharat Young Leaders Dialogue ka dei ka bynta ba kongsan jong ka National Youth Festival 2026 kaba 29, ka ban sa long ha Bharat Mandapam, New Delhi, naduh ka 9 haduh ka 12 tarik Kyllalyngkot, 2026.
