Jowai, K’Lyngkot 04
Kumba ju long manla u snem ka 1 tarik u Kyllalyngkot ka jingpdiang burom ïa ka jingwan u snem thymmai ha sor Jowai ka ju long kaba shongshit bad shongkun bha na ka jingïashim bynta ki dorbar shnong bad ki kyntoit dong bapher bapher.
Hadien ba la dep ka jingbam ja khawai sngewbha kaba shisien shisnem ha man la ki shnong bad ki dong, ki nongshong shnong ki la ïamih paidbah ban leit shad kmen ha kylleng ki shnong ki dong ka sor Jowai hapdeng ki sur kiba pynum bad pynkyndeh ïa ka mynsien jong ki nongshong shnong.
Ha kane ka 1 tarik u Kyllalyngkot 2026 ruh la sakhi biang ïa ka jingïashim bynta shitrhem ha ka jingshad kmen da baroh ki nongshong shnong naduh ki longkmie longkpa ki samla kynthei bad shynrang kumjuh ki khynnah.
Hadien ka jingshad na kylleng ka sor Jowai ki dorbar shnong ki la wan ïuhkjat sa ha Ïawmusiang ban pyni ïa ki jingshad ryngkat ki jingrwai kiba kit jingmut bad ki rukom tem kiba pynshongshit ïa ka shnong ka thaw.
Ha Iawmusiang la pdiang burom ïa ki Dorbar shnong da ki nongïalam ka Synjuk Waheh shnong Jowai, ryngkat ka ophis District Tourism Officer, District Tourism Promotion Society ka Sorkar Jylla.
Ha kane ka sngi la donlang ka Kong SD Shylla kaba dei ka District Tourism, West Jaiñtia Hills ryngkat ka ophisar In-charge Women Police, Inspector ka Kong I Kharpran, kiba la aiti ïa ki syrnot sha baroh ki dorbar shnong ba ïashim bynta ha kane ka jinglehkmen snem thymmai.
Ha une u snem la don 19 tylli ki shnong bad ki dong kiba ïashim bynta kynthup 16 tylli ki Dorbar shnong ba kynthup ka Lumpariat Dorbar Shnong, Tpep Pale, Lion Mission Compound, Panaliar, Khimusniang, Tympang Iawmusiang, Mynthong, Moosalyngkat, Salaroh, Ladthadlaboh, Caroline Colony, Loomsooiung, Dongmihsngi, Tyngdoo Wapung, Chutwakhu, Mookyrdup bad ka Khliehmynkrem, Khliehiongriang bad Myntdu Pynthornein.
