Hyderabad, Kyllalyngkot:
Ka jingrakhe ïa u bnai jong ka National Road Safety ne ka jingbuh jingshngaiñ ha ka surok bah ha Telangana State Road Transport Corporation (TGSRTC) ha ka sngi Palei, ha kaba ka jylla ka la buh ïa ka thong kaba khraw ban pynduna ïa ka jingïap na ki jingjia aksiden ha surok da 50 percent ha u snem ban wan.
Ïa kane ka jingïalap kaba neh shibnai, la thmu ban pynkut haduh ka 31 tarik u Kyllalyngkot hapoh ka phang pdeng ‘Sadak Suraksha – Jeevan Raksha’, la plie paidbah ha ka jingïadonlang u Ponnam Prabhakar, uba long u Myntri ka tnad Transport.
Ha kane ka jingïalang, u Myntri u la ai khusnam ïa ki nongñiah kali ba lait na ka jingjia aksiden sha ki 18 ngut ki nongñiah kali RTC, kiba la pyndep ïa ka jingshakri palat 30 snem khlem da ngat wat tang kawei ka jingjia aksiden ha surok, da kaba pynpaw ïa ka jingdonkam ban ñiah kali da ka jinglong ba pyrkhing bad ba don ka jingkitkhlieh.
Haba kren ha kane ka jingïalang, u MD ka TGSRTC u Y Nagi Reddy u la ong: “Watla kumba 600 tylli ki jingjia aksiden ki ju jia man la u snem, hynrei ka RTC ka buh jingthoh tang 0.07 tylli ki jingjia aksiden ha ka shi lak kilomitar, kaba buh ïa ka hapdeng ki seng kiba duna tam ka jingjia aksiden ha ka ri,” u la ong.
Shwa ïa kane ka sngi, u Myntri u la plie ïa ka jingrakhe ïa ka Road Safety Month ha RTA Khairatabad. U la pyllait ruh ïa ki Poster halor ka jingshngaiñ ha surok bad ki kot pynshai na ka bynta ki samla pule. Ha kane ka sngi la ïadonlang u Special Chief Secretary Vikas Raj, Transport Commissioner K Ilambarithi bad u District Collector Dasari Harichandana.
