Mairang, K’Lyngkot 05
Ka jingbym kheiñ snep bad ka jingshim kabu jong ki briew, khamtam kiba poi ban leit kai bad jngohkai da kaba bret pathar ïa ki plastik, ki bilor bad wat ban pynpait ruh ïa ki bilor harud ki wah ka long shisha kawei na ki bynta ba ki shnong ki thaw kiba don ïa ka jingangnud ban ïoh ïa ka khuid ka suba ba kin sngew bynñiaw jur.
Halor kane ka khubor, ha ka step ka sngi Nyngkong ki nongïalam shnong jong ki ar tylli ki shnong ba kynthup ïa ka shnong Tengri bad Dewsaw ha Eastern West Khasi Hills da ka jingsngewkhia ki la hiar ha ka wah ‘Shait shait’ kaba don hapdeng kine ki ar tylli ki shnong ban leit jurip ïa ka jinglong jingman jong katei ka wah, ha kaba watla ki don ïa ki jaka, ki wah, ki kshaid kiba itynnad hynrei namar ka jingbym kheiñ snep bad ka jingbym kheiñ kor jong ki briew kiba wan kai ha ki bynta jong katei ka wah, katei ka wah kala sdang dap sa tang da ki plastik, ki bilor bad kiwei-kiwei kaba pyni saitmet bad ap jingma ruh ïa kiba ïaid ba ïeng.
Shuh shuh ha katei ka sngi, ha ka jingdonlang u Sordar shnong Tengri, Bah Fairmoonstar Kharbani, Secretary Bah Dromlin Marbaniang, Sordar shnong Dewsaw Bah Phomlingstar Kharbani, u Bah Dibarbor Lyngdoh uwei na ki riew rangbah jong ka shnong Tengri bad kiwei kiwei ki riew rangbah jong baroh ar tylli ki shnong, kum ka dak jong ka jingmaham ïa ki nongwan kai ba ki dei ban long kiba don akor don burom, ki ar tylli ki shnong ki la thung ruh ïa ki ‘signboard’ ha ki bynta jong katei ka wah ha ryngkat ki jingmana.
U Bah Dibarbor Lyngdoh ha ka jingdonlang ki Sordar ki ar tylli ki shnong haba kren ha u nongthoh khubor u la ong ba katei ka jaka baroh shikatta ka dei ka jaka kaba ki briew ki wan ban ïa sngewtynnad ban wan sum wan sait namar ki ïohi ïa ka um kaba khuid, ki don ruh ki jaka kiba itynnad, ki briew na kylleng ka district, ki shnong ba marjan bad wat nabar jong ka Jylla ki ju wan khah khah na ka por sha ka por ban ïaleh kmen ha kane ka jaka.
U la ong ruh ba ha ka jingbun jong kiba wan, baroh shikatta kum ki shnong kim don eiei ka jingbthah lane ka jingong na ka liang ka shnong hynrei haba peit bad khmih bniah na ka jingwan jong ki briew na ka por sha ka por, ka la kylla long pynban ka jaka ïaleh jakhlia lane pynjaboh.
Shuh shuh u la ong ba ki don ki briew kiba wan kai ki pynlong pynban kum ka jaka ban bret jakhlia, ki ïa bam ïa dih nangta hadien ba la dep ki ïa pynpait ïa ki bilor, ki bret ïa ki plastik don katto katne ruh kiba wan saitjaiñ ki bret ïa ki jakhlia jakhlait.
Ha ka jingjurip bad haba ïaid ter-ter ïa katei ka wah bad haba bishar, ka la wanrah ïa ka jingsngewsih bad kthang mynsiem ha ki nongïalam shnong ban lap ïa ka jingleh pathar jong ki briew ba wan kai sha kane ka jaka.
“Ngi buh ïa kane ka signboard ym na ka bynta ban khang syndon ïa ka jinglehkmen hynrei kum ka jingmaham na ka bynta kito kiba shim kabu ha kaba leh ïa ki kam jaboh,” ong u Bah Dibarbor.
Shuh shuh u la ong ruh ba da ka jingïasngewthuh jingmut lang baroh ar shnong la rai ba nangne shakhmat lada lap ïa kino-kino ki briew kiba pynjaboh bad leh pathar, ka shnong kan hap shim katkum ka aiñ jong ka shnong.
