Ba thmu ban thang noh ïa u Coke da ki karkhana ha ka thaiñ Maweit

Nongstoiñ, K’Lyngkot 05

Ha ka sngi Nyngkong ka Maweit Land Owner’s Trader & Labour Association (MALOTLA) kala leit ban ujor bad ïakynduh ïa u Deputy Commissioner (DC) ka West Khasi Hills pyrshah halor ka jingkam ba ka Nongrim Hills Coke Factory kaba don ha shnong Lamjew, West Khasi Hills, Nong-stoiñ Syiemship bad ka Rymbai Coke Factory kaba don ha u pud synshar ka shnong Miang-kain, Nongstoiñ Syiem-ship, West Khasi Hills District ki la thmu ban thang noh ïa u Coke ha kitei ki ar tylli ki karkha-na khlem da bud ïa ki kyndon.      

Ha ka jingthoh ba la aiti sha u DC, na ka liang ka Association kala kam ruh ba ïa u dewïong la shu shim be-aiñ khlem da ïoh ïa ki challan lane jingithuh na ka bor jong ka aiñ.

Shuh shuh ha katei ka jingthoh ba la phah sha u DC ïa kaba la soi da ki nongïalam jong ka, ka Association ka la pynpaw ruh ba ka pyntip sha u kum u khlieh bad nongpeit ïa ka District hi baroh kawei ban tuklar halor katei ka bynta namar na ka liang jong ki paidbah kin sa ïamih paidbah ha ka 9 tarik mynta u bnai ha ka por 11 baje mynstep ha katei ka jaka ban khang paidbah ïa ka jingpyntrei bad thang jong kitei ki karkhana.

Shuh shuh ki nongïalam ka MALOTLA ki la kyntu ïa u DC ba un shimkhia ban ai ki lad jingïada da kaba phah ïa ki bor pulit ha katei ka sngi khnang ban ym mih kino kino ki jingjia ba sngewsih ha katei ka sngi la ka dei ïa ki paidbah ne ki nongtrei jong ka karkhana.

Na ka liang u Bah Anthony Umiong, Secretary ka MALOTLA u la ong, hadien ba kala don ka jingïakynduh ha kaba ïadei bad ka jingwan buh ïa ki ‘coke factory’ na ka liang jong ki, ki la leh ïa kaei-kaei kaba kum ka dong ka thaiñ kim lah ban pdiang ha kaba na ka liang jong ki, ki la pynkheiñ ïa kaei kaba la ïa kut bad ka Association naduh ba sdang.

U la ong ruh ba ha ka jingïakynduh bad u DC, na ka liang jong u, u la kular ban shimkhia ban tuklar bad ban phah ruh ïa ki briew ha katei ka sngi.