Shillong, K’Lyngkot 05
Ka Bharatiya Janata Party (BJP) jong ka Jylla ka la ban jur halor ka jingdonkam ban ker sainar ha shilynter khappud jong ka India bad ka Bangladesh.
“Ka jingker sainar ha shi lynter khappud bar-ri bad ka Bangladesh ka long kaba donkam bha. Ngi sngewkhia bha ïa ki khappud jong ngi bad ka Bangladesh bad ngi kyrmen ba yn sa lah ban pyndep kloi ïa ka jingker sainar ha khappud bad ki briew ki sngewthuh ba ka jingker sainar ka long kaba donkam eh,” ong u State General Secretary ka BJP, Bah Wankitbok Pohshna haba kren sha ki nongthoh khubor ha ka Lah Sngi U Blei.
U la kdew ba ka Sorkar Pdeng ka la shimkhia bha ïa kane ka kam hadien ba ka BJP ka la shimti ïa ka bor synshar ha ka ri.
“Ka dei tang hadien ba ka BJP ka la shimti ïa ka Sorkar (Sorkar Pdeng) ba la shimkhia bha ïa ka jingker sainar ha khappud,” u la ong.
U Bah Pohshna u la kdew shuh-shuh ïa ka jingkiew haba phai sha ki jingtei ha ki jaka khappud bad ong, “Lada phi peit ïa ka roi ka par ha ka liang ki jingtei ha ki jaka khappud, la pynkhlaiñ shuh-shuh hadien ba la shimti ka Sorkar BJP. Ka kam ka dang ïaid shakhmat bad ngi khmih lynti ba yn sa pyndep ïa ka jingker sainar ha khappud katba nang ïaid ka por.”
Na ka liang une u nongïalam ka BJP, u la pynrem ruh ïa ki jingbyrngem-byrsit ba dang shen ha ki rynsan lad pathai kiba mih na Bangladesh, da kaba ong ba ki long “ki bym lah pdiang” bad ban jur ba ka seng ka long kaba peitngor.
“Ngi la ïohi ïa ki jingbyrngem lyngba ki rynsan lad pathai bad ngim lah ban pdiang,” u la ong.
U la bynrap ba ka jingbyrngem ïa ki 7 Jylla ka Thaiñ Shatei Lam Mihngi ka long kaba sngew-sammut, da kaba kdew ba ka Thaiñ Shatei Lam Mihngi ka dei ka bynta ba kongsan jong ka India bad ka ïoh ïa ka jingïada kaba skhem.
“Ka jingbyrngem ïa ki 7 Jylla, ka long kaei-kaei kaba pynlong ïa ngi ban kwah rkhie namarba ngi don ha ka ri kaba ai ïa ka jingïada kaba skhem bad ba ka Thaiñ Shatei Lam Mihngi ka dei ka bynta ba kongsan jong ka India, bad kumta ym don mano-mano ruh ba lah ban pynkylla ïa kata,” u la ong.
Shuh shuh u Bah Pohshna haba pynpaw ïa ka jinglong-jingman ba mynta ha Bangladesh, u la ong: “Kita ki jingbyrngem, aïu ngin ong – ka jinglong-jingman ha Bangladesh ka lah ban kylla ha kano-kano ka por namarba ym don Sorkar. Nga tikna ba ka Sorkar Pdeng ka shimkhia ïa kine kiei-kiei baroh.”
