Shillong, K’Lyngkot 05
Ka President jong ka Civil Society Women’s Organisation (CSWO) ka Kong Agnes Kharshïing ha ka janmiet jong ka sngi Nyngkong ka la leit ban wad jingtip na ka Police Board jong ka Civil Hospital Shillong, shaphang uwei u nongbylla ba la kynnoh ba u la duh ei ïa la ka jingim ha ka jingpynbthei bomb dynamite ïa ki maw na ka bynta ban ïoh khlong ïa u dewïong na kawei ka par dewïong be-aiñ kaba don ha ka shnong Thangsko, East Jaiñtia Hills District.
Ka Kong Agnes ka la ïathuh ba ka jaka ba khot ka Thangsko ka dei ka jaka Sorkari ba ki briew ki ju pyndonkam ban rep ha ki por ba kham mynshwa bad mynta ki la sdang ban tih da kaba la pyndonkam ïa ki bomb dynamite ban pynpait ïa ki maw khnang ban ïoh khlong ïa u dewïong.
Shuh-shuh ka la ïathuh, katkum ka jingïohlum jingtip jong ka, la don arngut ki nongbylla kiba la ïap na ka daw katei ka jingbthei u bom dynamite, u wei uba la tip kyrteng u Ashok Tamang ba 34 snem ka rta u ba la khlad noh ha Civil Hospital Shillong katba ïa uwei pat u ba la khlad ym pat lah ban ithuh kyrteng.
Ka Kong Agnes ka la dawa ïa ki pulit ba ki dei ban pynlong ïa ka jingtohkit kaba bniah bad ban pynher da ki drone ha kitei ki jaka ba la jia kane ka jingjia khnang ban lah ban sei madan ïa ki jingshisha sha ki paidbah.
