Thiruvananthapuram:
Ki la don baroh kumba 500 tylli ki kali ar shaka kiba la shah bam duh ha ka ding kaba jur bha kaba la jia ha ka jaka ïeng kali hajan ka Platform 2 jong ka Station Rel Thrissur ha ka sngi U Blei.
Ka jingïarap ha ka por kaba biang jong ki bor pynlip ding ka la khanglad ïa ka ding ban pur sha ki jaka ba kongsan.
Ka Mallika, ka nongtrei jong ka jaka ïeng kali ha katei ka steshon, ka la ïohi nyngkong ïa katei ka ding.
“Ka jingthaba khlek khlek na u Power Cable u la hap ha ka plastik kaba la sop ïa kawei ka bike. Ka la kem ding bad ki thylliej ding ki la sdang ban pur. Nga la khot ïarap katba nga dang theh um na ka bilor kaba nga don. Hynrei ka Tank umphniang jong ka bike ka la bthei. Nga la tieng bad pyrta ban pan jingïarap”, ka la ong.
U ophisar jong ka tnad pynlip ding jong ka Thrissur u Anilkumar T u la ïathuh ba ki la ïoh jingtip ha ka por 6.35 baje mynstep bad ki la leit bran bran sha katei ka jaka.
“Kumba 30,000 litre ka um la pyndonkam ban tem ïa ki thylliej ding. Lyngba ka jingïarap ha ka por kaba biang, ngi lah ban khanglad ïa ka ding ba kan ym pur sha ka Automatic Signal Unit kaba don ha ka Platform”
U la ong ba ïa ka daw ba thikna jong ka jingpluh lah ban lap tang lyngba ka eksamin bad khmih bniah. La pynlip ïa ka ding hapoh 30 minit bad kam shym la ktah ïa ka jingleit jingwan jong ki rel.
Ha kane ka sngi u Myntri ka Revenue u K Rajan, u MLA u P Balachandran bad u Mayor u Niji Justin ki la leit jurip bniah ïa kane ka jaka ba la jia ka jingjia. U Rajan u la pan ïa ka kaiphod kaba bniah halor ka jingjia.
U heh pulit jong ka jylla u Ravada A Chandrasekhar ruh u la leit jngoh ïa katei ka jaka bad pan ïa ka kaiphod. “Ka dei ka jingbakla kaba jur bha ha ka liang ka jingshngaiñ. Ïa ki jingtip ba bniah lah ban pyntip tang katkum ka kaiphod”, u la ong.
Ha ka kyrwoh, ka Southern Railway, ka la kyntait ïa ki jingkynnoh ba ka jingsdang jong ka ding ka la long na u Cable ba don halor jong kane ka jaka ba la jia ka jingpluh, ka la ong ba ka ding ka la sdang ban kem na kawei ka thuk thuk ba la pynïeng ha kane ka jaka.
La lah ban tehlakam kloi ïa ka ding namar ka jingïatreilang jong ki nongpynlip ding, ki nongshong shnong bad ki pulit ka tnat Railway, la ong ka kyrwoh khubor, kaba la kyntait ïa ki jingkren ba la kren da ka Mallika bad ong ba ki dei ki sakhi ki bym don nongrim.
