Delhi, K’Lyngkot 05
Ka tnad Textiles ryngkat ka jingïatreilang bad ka Sorkar Assam, kan pynlong ïa ka National Textiles Ministers’ Conference ha ka 8-9 tarik Kyllalyngkot 2026 ha Guwahati, Assam. Ïa kane ka jingïalang yn pynlong hapoh ka phang “India’s Textiles: Weaving Growth, Heritage & Innovation.”
Kane ka jingïalang kaba ar sngi ka thmu ban pynïasoh lang ïa ki Myntri ka tnad Textiles jong ka Sorkar Pdeng bad ki Jylla, ki ophisar jong ka Sorkar Pdeng & ki Sorkar Jylla, ban ïamir jingmut ïa ka rukom treikam kaba ïasohlang ha ka ri na ka bynta ban kyntiew ïa ka India kum ka jaka pdeng jong ki kam pynmih jaiñ ha ka pyrthei. Ki jingïamir jingmut ki ïahap bad ka jingthmu jong ka ri ban kyntiew ïa ka kam shna jaiñ kaba kot sha ka USD 350 billion bad ban kot sha ka USD 100 billion ha ka jingshalan jaiñ shabar ri shuwa u snem 2030.
Ha ka jingïalang plie paidbah ha ka 8 tarik Kyllalyngkot 2026 yn ïadonlang u Myntri ka tnad Textiles jong ka Sorkar Pdeng u Giriraj Singh, u Myntri Rangbah ka jylla Assam, u Himanta Biswa Sarma, u Myntri Khynnah ba dei peit ïa ka tnad Textiles, u Pabitra Margherita ryngkat kiwei pat ki kynrem ki lyndan.
Kane ka jingïalang kaba ar sngi kan don ki jingïalang kiba pynleit jingmut halor ki jingdon jingem & ka jingbei tyngka, ka jingkyntiew ïa ka jingshalan mar shabar ri, ka jinglah ïakhun, ki tiar ba donkam & ki fibre, ki lad ba thymmai, kynthup ïa ka technical textiles, ka jingwad bniah bad jingpynroi, ka jingpynthymmai ïa ki jaiñ tynrai, da kaba pynleit jingmut ha ki jaiñ bad ki tiar ba shna da ka kti na ka bynta ki ïew kiba mynta.
La khmih lynti ba ki Myntri bad ki ophisar Sorkar na ki Jylla bad ki Union Territory kin ïashim bynta bad ïasam ïa ki rukom treikam kiba bha tam, ki jingeh bad ki jingai jingmut ha ka polisi kiba thmu ban pynkhlaiñ ïa ka jingpynbha ïa ki kam ba ïadei bad ki jaiñ ha kylleng ki thaiñ bad ki distrik.
Yn pynlong ruh ïa ka jingïalang halor ka “Strengthening and Empowering the Textiles Sector of the North-Eastern Region of India” ha ka 8 tarik Kyllalyngkot 2026, ha kaba yn ïashim bynta da u Myntri ka tnad Textiles jong ka Sorkar Pdeng, u Myntri Khynnah ka tnad Textiles, ki Myntri Sorkar Jylla na baroh ki Jylla ka thaiñ Shatei Lam-Mihngi, ki dkhot jong ka Parliament bad ki heh ophisar. Ka jingïalang kan pynleit jingmut ha ki jaiñ silk, ki jaiñ shna kti bad ki jaiñ ba la shna na ki siej, ka jingkyntiew ïa ki kam ba la ïalam da ki kynthei, bad ka jingpynpaw ïa ka “Textiles from North-East”, kaba thmu ban plie ïa ki bor ba kyrpang jong ka thaiñ ha ki kam jaiñ bad ban pynïasoh ïa ki bad ki kam pynbha ha ka ri bad ka pyrthei.
La pynlong ruh ïa ka exhibition kaba kyrpang ban pyni ïa ki jaiñ bad ki tiar ba shna da ka kti na kylleng ka ri da ka ophis jong u DC Handlooms bad DC Handicrafts.
