Shillong, Kyllalyngkot 05
U President ka National People’s Youth Front (NPYF) u Bah Nickey Nongkhlaw u la ong ba la shim khia ïa ka kam halor ka jingdon ki jingshah thombor ki Khristan ha shwa ka Khristmas da kaba pynsngew lyngba ka jingthoh sha u Myntri Rangbah ka Jylla u Conrad K Sangma ban phah shimkhia mardor.
U la ong ba ha ka jingthoh la kyntu ba ïa kane ka kam dei ban bishar bniah bha ryngkat u Myntri Kam Pohïing ka ri India u Amit Shah.
Haba kren sha ki lad pathai khubor, u Bah Nickey Nongkhlaw u la pynpaw ba kum kine ki jingjia ki dei ka jingmih na ka jingleh jong ki katto-katne ngut ki riew shimet kiba la shah ïalam bakla bad kiba duna ka jingsngewthuh kaba biang ïa ka nongrim jong ka jinglong niam ha ka ri.
U la ban jur ruh ba ki briew na ka thaiñ Shatei Lam Mihngi ki ju shah ban beiñ, watla ki burom ïa ki rukom leh niam jong kiwei pat ki kynhun niam. Da kaba kdew ba ki jingrakhe bad ki jingleh niam kum ki Puja ki ju long beit khlem kano-kano ka jingpynthut na ka liang jong ki.
U Bah Nickey u la kdew ba katto-katne ngut ki dkhot jong ka kynhun niam Hindu ki la pynrem jur ïa ka jingleh jong ki katto-katne ki riew shimet kiba dei na ki seng kum ka VHP bad ka Bajrang Dal ha ki social media da kaba pynpaw ba kum kine ki jingleh kim pynpaw ïa ka jingsngew jong ka imlang sahlang baroh kawei.
