Shillong, K’Lyngkot 05
U khlieh nongïalam ka Congress, Bah Vincent H. Pala ha ka Lah Sngi U Blei u la kyntu ban husiar halor ka kaiphod ‘Expert Committee’ kaba dang shu aiti shen halor ka bhah thung kam jong ka Jylla, da kaba maham ba ka Sorkar ka dei ban bud ryntih ïa ki rukom treikam hashuwa ban pynpaw paidbah ïa kino-kino ki jingai jingmut.
“Nga tharai ba hadien ba ka ‘Expert Committee’ ka la aiti ïa ka kaiphod halor ka ‘State Reservation Policy’, ka Sorkar ka hap ban ïakren halor kane bad hadien kata kin sa buh hakhmat ka Ïingdorbar. Kim lah ban shu pynpaw paidbah kumto,” la ong u Bah Pala.
U la batai ïa ka rukom treikam haba ïadei bad ka jingkhmih bniah ïa kum kine ki kaiphod da kaba ong, “Kumba ju long, haba phi thaw ïa ka Komishon, ngam tip kaei ka jait rukom treikam, hynrei lada ka dei ha ka Sorkar Pdeng, nyngkong eh ki hap ban ïakren shuwa ha ka Sorkar, kano ka jingai jingmut kaba ki shim bad kano ka jingai jingmut kaba ki kyntait bad nangta kin sa ïatai hapoh Ïingdorbar bad hadien kata, kin sa lah ban pynpaw paidbah.”
U Bah Pala u la pynpaw ïa ka jingsngewkhia kaba hap ban phikir haba ïadei bad kane ka mat, da kaba kdew ba ka kaiphod ka kynthup ïa 4,000-5,000 sla bad ka lah ban don ïa ki jingktah kiba ïar.
“Kan shim por ïa ka Sorkar ban pule bniah ïa ka kaiphod kaba 4,000-5,000 sla. Kam dei ka kam kaba suk. Namarba kane ka dei ka kam kaba hap ban phikir bha naba ka lah ban kynthup ïa kaei-kaei kumba la jia ha Manipur, Jammu & Kashmir, Bangladesh. Ha Bangladesh, ka mat kaba kongsan ka dei ka bhah thung kam. Kumta, ka Sorkar ka dei ban pule bniah bha ïa ka bad la ki pdiang ne ki kyntait ïa ka”, u la pynpaw.
U la bynrap ba ka jingpynleit jingmut jong ka Sorkar kan donkam ïa ka jingpyrkhat kaba phikir bha khnang ban lait na kiei-kiei baroh.
“Nga tharai (ka Sorkar) kan shim por namarba ka mat ka long kaba hap ban da phikir bha naba kaei-kaei ka lah ban jia ha kano-kano ka por,” u la ong.
Ha ka 19 tarik u Nohprah, 2025, u Myntri Rangbah ka Jylla, u Conrad K. Sangma u la pyntikna ba ïa ka kaiphod jong ka ‘Expert Committee’ halor ka ‘State Reservation Policy’, kaba khia kumba 200 kilo bad kaba don haduh 4,000-5,000 sla, yn sa pynbna paidbah shen.
Ha kawei ka liang, la bynshet kam ïa u Chief Secretary bad kiwei-kiwei ki heh ophisar ka Jylla ban pule bniah ïa kawei-pa-kawei ka laiñ bad sla jong ka kaiphod ka ‘Expert Committee’ bad ban aiti ïa ka kaiphod sha ka Sorkar.
