Shillong, K’Lyngkot 05
Ka Hynñiewtrep Youth Council (HYC) ka la kynthoh jur ïa ki jingkren ba dang shen jong u Symbud Myntri Rangbah ka Jylla, Bah Prestone Tynsong ba ka Meghalaya Residents’ Safety and Security (Amendment) Bill, 2020 (MRSSAB) kan sa shu ïap hi noh kumto da kaba pynshong nongrim halor ka jingbym larkam jong ki Sorkar barim hapoh ka jingïalam u Dr. Mukul Sangma.
Ha ka kyrwoh khubor, u President ka HYC, Bah Roykupar Synrem u la ong ba katei ka jingkren “kam dei ka jingsngew saiñ pyrthei; ka dei ka jingpyni hi dalade jong ka jingbym lah jong ka Sorkar kaba mynta.”
U la ban jur ba ka aiñ kam ju ïap hi noh dalade; hynrei ka ïaid shakhmat da ka jingthmu ban long aiñ ne la shu iehnoh kumto lyngba ka jingbym leh eiei jong ki bor ba dei khmih.
“Ka rekod ka long kaba shai bad bym lah ban ïa wohnia. Ïa ka MRSS Amendment Bill la wanrah ha ka Ïingdorbar Thawaiñ ha u bnai Lber, 2020 hapoh jong u Myntri Rangbah ka Jylla ba mynta.
Ha u Naiwieng 2023, ïa kane ka ‘Bill’ la pynphai biang da ka tnad Kam Pohïing na bynta ban khmih bniah. Naduh kata ka por, ka Sorkar ka la pyntikna bunsien ïa ki paidbah ban khmih bniah biang, ban ïamir jingmut ha ka liang ka aiñ, bad ban ïatreilang bad ki nongshim bynta. Hynrei, watla ka la ïoh ïa ka jingbun paid kaba shai bad ka por kaba biang, ym shym la wanrah kano-kano ka jingpynkylla ha ka aiñ ba kongsan (Principal Act) hakhmat ka Ïingdorbar,” la kdew u Bah Synrem.
U President ka HYC u la kynnoh ba ka Sorkar ba mynta ka la ñiat ïa ka jingkitkhlieh sha ka bor synshar barim, da kaba ong, “Ki jingduna ha ka aiñ, lada ki don, lah dei ban pynbeit ha kano-kano ka por ha ka por ba synshar ka MDA. Ka jingbym lah ban leh kumta kam dei kaba la rim; ka dei kaba mynta.”
Ha kajuh ka por, ka seng ka la pynpaw ruh ïa ki jingïapher ha ka nongrim jong ka Sorkar.
“Ki jingkam ba na ka por sha ka por ba ka Sorkar Pdeng kam shym la kyntait ïa ka ‘Bill’ ka ïapher na ka jingkubur kaba mynta ba la shah ïa ka ban ïap noh. Kine ki nongrim ki bym ïahap ki pynskhem ïa ka jingsngewthuh jong ka jingbym lah shim rai bad ka jingbym shimkhia halor ka mat kaba ktah beit-beit ïa ka jingshngaiñ jong ki trai-ri trai-muluk bad ka jingskhem ha ka jingbun briew,” u la ong.
Ka HYC ka la maham ba ka jingailad ïa ka saiñdur ka MRSSA ban khyllem, khlem da don kaba mih bujli ka pyni ïa ka “dak jingma ba ka jingïada ïa ki trai-ri trai-muluk ka long kaba lah ban ïakren, ban pynkynriah, bad ha kaba kut ka bym long kongsan.”
Ha kajuh ka por, ka seng ka la dawa ïa ki jubab kiba shai na ka Sorkar halor katei ka bynta.
Katkum ka jingong jong une u nongïalam, ka HYC kan buddien ïa kane ka kam lyngba baroh ki lad ki lynti jong ka synshar paidbah bad katkum ka riti synshar ka ri tad haduh ba ka Sorkar kan ai jingshai halor kane ka bynta.
