Shillong, K’Lyngkot 05
Ha kane ka juk ba mynta ki briew ha kylleng jong ka Jylla Meghalaya la ñiar ban shem bad ïohi ba kin leit jingleit ne leit pule da ka Bicycle.
Haba phai khyndiat ha Nongbah Shillong ki paidbah nongshnong shnong khamtam ki khun samla ki dang duna bha kiba leit ba wan da ki Bicycle lane ki samla pule kiba leit sha ki klas da ka Bicycle.
Ka Bicycle ka dei ka wei kaba ïarap ruh ha ka wei ka bynta ban pyllait na ka jingktah ïa ka mariang namar ka Bicycle kam donkam ban thep petrol. Ym tang katta ka ïarap ruh ban kham kloi ha ka kam ka jam haba leit ne wan khamtam ha kum kane ka por ba la jur ka jingdheng kali ha baroh ka wei ka sor Shillong.
Kaba kongsan eh ka long ba ka Bicycle ïarap ïa ka bor met jong u briew namar ka long kum ka jingkilan met ha kajuh ka por.
Haba phai sha u Samla Sharailang Basaiawmoit uba sah ha 3 mile, Upper Shillong uba dei na ka Shnong Kharthangmaw Nongthliew Area kaba hap hapoh ka Eastern West Khasi Hills District, u la pyni ka nuksa kaba bha sha ki khun samla ka Jylla da kaba leit bad wan sha klas lyngba ka Bicycle man la ka sngi.
U samla Sharailang Basaiawmoit u dei uba dang pule ha ka 1st Semester ha Shillong Commerce College.
Haba ïoh ïakren bad u Nongsaiñ Hima u samla Sharailang u la ïathuh “Kaba la pynlong ïa u ban sngewtynnad ban leit klas da ka Bicycle ka dei namar ba ka jinglut ka kham duna bad kan nym bam than ïa ka por”.
“Sha Shillong kiba leit klas da ka Bicycle ki dang duna bha namar nga la leit 2 tylli ki jaka pule bad kiba ñiah Bicycle ki dang duna bha, namar shane ki khynnah samla ki kham ïabeh ïa ka bike”.
Kumta u la kyntu bad ai mynsiem ïa ki samla ba ki dei ban shlur ban leit ban wan da ka Bicycle namar ka ïarap ïa ki kmie ki kpa ban lait ka jinglut jingsep, khamtam ïa ki samla pule kiba hap ban siew ka bai klas, hynrei lada leit da ka Bicycle ka ïarap ban beh ïa ka por.
“Nga la pyndonkam da ka Bicycle haba leit ba wan sha klas mynta la kumba 2 snem tam eiei. Ka jingsngewtynnad ka long ba ka Bicycle ka lait na ka jingslem jong ka por namar lada leit da ki kali kamai kan slem namar ka jingdheng kali kaba jur bha,” la ong u samla Sharailang.
U la ïathuh ruh ba nyngkong u la sdang ñiah Bicycle haba ïakop ha ki rynsan bapher-bapher bad da ka jingsngewtynnad bad jingmlien kum ka jingkilan met ïalade u la pyndonkam ruh wat haba leit sha jaka pule.
Haba kylli u samla Sharailang u la ïathuh ba ka jingsngewtynnad ban ñiah Bicycle ka dei naduh ki por ba u dang khynnah bad u shu ïoh ban ñiah da ki Bicycle jong ki paralok.
