Shillong, K’Lyngkot 05
Ka Bharatiya Janata Party (BJP) Meghalaya ka dang ïai pynkhreh ban ïakhun ïa ka ilekshon MDC sha ka Garo Hills Autonomous District Council (GHADC) ban sa long shen.
Haba kren sha ki nongthoh khubor ha ka sngi nyngkong, u Bah Wankitbok Pohshna General Secretary ka BJP Meghalaya u la ong “ka jingpynkhreh ka la sdang naduh ki constituency kiba ka party ka don ïa ka jingkyrmen ba kan jop ha kane ka ilekshon GHADC ka ban sa long.”
U la ïathuh ba ka BJP ka la dep ruh ban thaw ki Mandal Committee bad kine ki Committee ruh ki la sdang ban leh ïa kaba donkam haba ïadei bad ka jingjied ïa ki kyrtong bad ban ithuh na kano ka constituency ba kin ïakhun.
Shuh-shuh u Bah Wankitbok u la ong ba watla ka ilekshon MDC ka ïapher khamtam ha GHADC, hynrei ka party kan ïakhun beit namar ka don jingkyrmen ban jop na ki katto katne ki constituency.
Katkum ka jingong jong u, ka party ka la ïaid shakhmat ban pynkhreh ïa ka jingïakhun ha kane ka ilekshon GHADC bad shen ka party kan sa pyllait noh ïa ki kyrteng jong ki kyrtong ki ban ïakhun ha kane ka ilekshon.
