Thiruvananthapuram:
Wat hapdeng ka jingpynbor na ka liang jong ka seng Congress kiba wad ïa ka jingïamir jingmut kaba kham bun na ka bynta ki samla bad ki longkmie, la ïathuh ba ki heh nongïalam ha ka jylla ki la poi sha ka jingïasngewthuh jingmut ban pynrung kyrteng biang ïa kiba bun ki MLA ba mynta na ka bynta ka ilekshon Assembly ka ban sa wan.
Ki briew kiba don hapoh ka seng Congress ki la pynpaw ba ki nongïalam ki ngeit ba ka jingbat ïa ki nongthaw aiñ kiba shong kan pynthikna ïa ka jingïaid beit bad jingshong shngaiñ, katba kan ai khusnam ruh ïa ka jingtreikam bad ka jinglong ba ïaineh jong ki ha ka por ba don jingeh na ka bynta ka seng.
Lait noh tang u MLA ka Palakkad uba la shah beh seng, u Rahul Mamkootathil, ka Congress mynta ka don 21 ngut ki MLA. Na kine, ka jingïakhun kyrtong jong ki lai ngut ki MLA ka dang sah khlem pat lah ban pyntikna namar kiba bun ki daw bapher bapher.
Katkum ki tyllong khubor jong ka seng, u MLA ka Tripunithura u K Babu u la pynsngew ïa ka jingeh jong u ban wanphai biang sha ka jingïakhun ilekshon, halor ki nongrim jong ka koit ka khiah. Hynrei ka don ka jingpynbor ïa u nongthaw aiñ, kumjuh ïa ka KPCC, ban ïakhun.
Ka jingkiew jong ka BJP ha Tripunithura, hadien ba ka la kiew ha ka bor synshar ha ka Municipality, la kdew ruh da ki nongïalam ka seng, kum ka daw kaba kongsan.
Kiwei pat ki arngut ki MLA kiba la dei ban ïakhun, yn sa pyntikna da ka KPCC, kine ki kynthup ïa u Eldhose Kunnappilly (Perumbavoor) bad u I C Balakrishnan (Sultan Bathery), la ïathuh ka tyllong khubor.
U Balakrishnan, u mad ïa ki jingshah kynnoh bamsap ha ka mukotduma jong ka Wayanad Cooperative Bank, kaba ïadei bad ka jingïap jong u nongbat pisa jong ka District Congress Committee, u N M Vijayan, katba u Eldhose, u la shah kynnoh ba u la long u nongthombor bad pyndonkam bakla ïa ki kynthei.
“Namar ba u Rahul u la shah beh na ka seng, ka KPCC kan hap ban wad ïa u kyrtong uba biang ha Palakkad”, la ong uwei u heh nongïalam jong ka seng Congress.
“Ka Balakrishan ka mad ïa ka jingsngewsih hadien ka jingkhlad noh jong u N M Vijayan. Watla ki nongïalam ki sngewtynnat ban ailad ïa ki MLA ba mynta ban ïakhun, hynrei donkam ban long kiba husiar haba shim ïa ka rai halor ka jingkyrmen jong ka lad jong u Eldhose,” ong une u nongïalam. Haba la kheiñ ba ka Ernakulam distrik ka dei ka ktem ba khlaiñ jong ka seng Congress, ki don ki dak kiba pyni ba kane ka seng ka lah ban wad ïa uwei pat u kyrtong ha Perumbavoor.
Katkum ki tyllong khubor, watla u MLA ka Kovalam, u M Vincent, u mad ruh ïa ki jingshah kynnoh ba u donkti ban leh beijot, hynrei ka Congress kam lah ban pynsah ïa u. La ai biang ïa u ïa ka shuki ha ka ilekshon 2021, kaba u la jop.
“Namar ba u Vincent u dei u MLA ba marwei jong ka seng Congress na Thiruvananthapuram distrik bad u don ruh ka jingkyrshan hapdeng ki nongtrei ka seng bad ki paidbah, ban kyntait ïa u ïa ka shuki Kovalam ka lah ban long kaba eh”, la ong uwei u nongkitkam ka KPCC.
