New Delhi, Kyllalyngkot:
“Sngewbha ïarap ïa ngi ban wad ïa ka Nikitha” – ka post kaba la paw bad kaba la paw bha ha ka rynsan Facebook ha ka taïew ba la dep, kaba khot jingïarap ban wad ïa kawei ka kynthei nong India kaba 27 snem ka rta kaba la jah rngai ha ka miet snem thymmai ha America. “Ki paralok jong ka, ki la dep ban mudui da ka ejahar sha ki pulit hynrei ngi donkam shuh shuh ki nongsakhi haba ïadei bad kane ka bynta. Lada phi sah ha lane hajan ka thaiñ Columbia, sngewbha ban peitngor bha,” la thoh ha ki jingpynbna ha ki rynsan Social Media.
Ha ka 2 tarik u Kyllalyngkot, u Arjun Sharma, u lok barim jong ka Nikitha Godishala ruh u la mudui da ka ejahar jah rngai, ha kaba u la ong ba u la ïohi khatduh ïa ka ha ka 3 tarik u Nohprah ha ka ïing sah kaba don ha 10100 block jong ka Twin Rivers Road.
Ha ka sngi kaba bud hi, ki pulit jong ka Howard County, ki la lap ïa ka met jong u Godishala, kaba don ki jingmynsaw da ki khnam, ha ïing jong u Sharma. Haduh katei ka por, u Sharma u la phet noh sha India.
Ki nongtohkit ki ngeit ba u Sharma uba 26 snem ka rta u la pynïap ïa ka Godishala tang hadien ka por 7 baje janmiet ha ka 31 tarik u Nohprah.
U Sharma, u la phone sha u nombor 911 ban pyntip ba ka samla barim jong u, ka Nikitha Godishala, kaba na Ellicott City, ka la jah rngai. Ki pulit ki ngeit ba hadien kata u la leit sha ka kad liengsuiñ jong ka Dulles International Airport bad u la kiew da ka liengsuiñ kaba leit sha India.
“Ka paw shai ba ka la don katto katne ka jingthmu lypa ban lah ban leh ïa kane bad nangta ban phet noh na ka ri, kumta kata ka dei kaba ngi don mynta kat kum ka jingshah kynnoh,” ong u nongaiktien jong ki pulit jong ka Howard County, u Seth Hoffman ha u nongtohkit jong ka WJZ, u Mike Hellgren.
Ha ka Sngi Saitjaiñ, ki pulit jong ka Howard County, ki la talasi ïa ka apartment jong u Sharma bad ki la lap ïa u Godishala ba u la ïap ryngkat bad ki dak mong.
Watla katta, la ong ba u Hoffman um shym la tikna la ki pulit ki la lah ne em ban ioh biang ïa ki tiar ba la pyndonkam ban pynmynsaw bad pynïap ïa ka.
Ym shym la don kano kano ka jingkhot sha ka jingshakri ne kiwei kiwei ki jingujor shwa ha katei ka jaka sah, la ong u Hoffmain, kumba la ïathuh da ki lad pathai khubor.
