Hyderabad, K’lyngkot:
Haba pynbna ba ka rynsan saiñ hima sima kaba thymmai kan sa mih ha kane ka jylla, ka K Kavitha ha ka lah sngi U Blei, ka la pynbna ba ka kynhun jong ka, ka Telangana Jagruthi, kan ïakhun ha ka ilekshon sha ka Ïingdorbar Thawaiñ ban wan, kaba lah ban long ha u snem 2028 lane 2029.
Ka Kavitha, ka nongseng bad ka President jong ka Telangana Jagruthi bad ka khun jong u Myntri Rangbah barim ka jylla, u K Chandrasekhar Rao, dang shen ka la aiti ïa ka jingiehnoh kam jong ka kum ka Member of the Legislative Council (MLC).
Hynrei u Chairman ka Council u Gutha Sukhender Reddy um shym la pdiang ïa ka jingiehnoh kam jong ka.
Hadien kane, ka la kyrpad ïa u Chairman ban ailad ïa ka ha kane ka dorbar Legislative Council kaba dang ïaid shakhmat ba kan kren bad pynshai ïa ki daw jong ka rai jong ka.
Haba kren ha ka Council ha ka lah sngi U Blei, ka Kavitha ka la kynthoh ïa ki nongïalam ka BRS, da kaba kynnoh ba ka seng ka la kylla long kum ka jaka pynbhabriew ïa ka saiñpyrthei na ka bynta kito kiba la shet kylla ïa ka jingïakhih ban ïoh ïa ka jylla Telangana.
Ka la kyntait ruh ïa ki khubor ba ka jingïapher jingmut jong ka bad kiba haïing hasem ka dei halor ki bhah ha ki jingdon jingem jong ka ïing ka sem, da kaba bynrap ba ka jingïaleh jong ka ka long na ka bynta ka jingburom ïalade ym na ka bynta ka jingdon jingem.
Haba kren ha ka sur kaba sngewkhia, ka Kavitha kaba la shah set phatok ha kaba ïadei bad ka kam khaïi kyiad ha Delhi, ka la kynnoh ba ka BRS kam shym la kyrshan ïa ka ha ka por ba ka kynhun CBI bad ka kynhun Enforcement Directorate ki la pynlong ïa ka jingkhynra.
Ka la bynrap ba ki katto katne ki nongïalam jong ka BRS ki la thmu ïa ka da kaba pynshitom beiñ bad ki la pynbor ïa ka ban mih noh na ka seng.
Ka Kavitha ka la kynthoh ruh ïa ka BRS ba kam ju pyrkhat satia ïa ka bha ka miat jong ki longïing jong ki martyr jong ka Telangana bad ka la pynkynmaw ruh ba ka la pyrshah ïa ka jingpynkylla kyrteng jong ka seng na ka Telangana Rashtra Samithi (TRS) sha ka Bharat Rashtra Samithi (BRS).
Ka Kavitha, ka la aiti ïa ka jingiehnoh kam jong ka, kum ka MLC, ha ka 3 tarik Nailur, 2024, shi sngi hadien ba ka la shah weng kam na ka seng.
Hadien ka jingkren jong ka, u Chairman jong ka Legislature Council u Sukhender Reddy u la ai jingmut ba ka Kavitha ka la iehnoh kam ha ka jingsngewkhia bad kyntu ïa ka ba kan pyrkhat biang ïa ka rai jong ka.
