New Delhi, K’lyngkot:
Ka Priyanka Gandhi Vadra, ka nongïalam jong ka seng Congress, ka la shah thung kum ka Chairperson jong ka Screening Committee, na ka bynta ban jied ïa ki kyrtong, na ka bynta ka ilekshon sha ka jylla Assam, kaban sa long shen.
U General Secretary (organisation) jong ka All India Congress Committee (AICC) u KC Venugopal ha ka miet jong ka sngi Saitjaiñ u la pynbna ban thaw ïa ki komiti ban peit bniah ïa ki san tylli ki jylla bad ki Union Territories ki ban leit thep vote ha ka shiteng snem mynta u snem.
Ïa kine ki komiti kiba don saw ngut ki dkhot la thaw na ka bynta ka Assam, West Bengal, Kerala, Tamil Nadu, bad Puducherry ban pyndep ïa ki thup kyrteng ki kyrtong ban ïakhun ha kane ka ilekshon ka ban wan ha ka jylla, ong ka kyrwoh ba la pynmih da ka seng.
Ka Priyanka, kaba dei ka General Secretary jong ka AICC bad ka parliamentarian, ka la shah jied kum ka Chairperson jong ka komiti na ka bynta ka Assam, ha kaba ka Congress, ka thmu ban ïakhun ïa ka ilekshon, da kaba ïatreilang bad kiwei pat ki seng pyrshah bad ban knieh noh ïa ka bor synshar na ka BJP.
Ka ilekshon sha ka ïing dorbar jong ka Assam kaba don 126 ngut ki dkhot, ka lah ban long ha u bnai Lber haduh Ïaïong.
