Shillong, K’Lyngkot 05
Ka Gatekeeper (Meghalaya Chapter) ka la pynbna ba ka Meghalaya Revival & Healing Festival (MRHF) 2026, kan long ha ka 27 tarik u Kyllalyngkot haduh ka 30 tarik u Kyllalyngkot ha Dieng Jabini Ground kaba don mar pyrshah bad ka Kurkalang Sports Complex ha Bhoirymbong.
Haba kren sha ki lad pathai khubor u Convener ka MRHF, u Bah Crosslin Marbaniang u la ong ba kane ka Festival kan long 4 sngi lynter bad la pynlong ïa kane ka Festival ka long khnang ba ki paidbah kin ïa wan ban shakri, ban dwai bad pynkylla thymmai ïa ka jingim bad ban kyntiew ïa ka jinglongsuk ha ka imlang sahlang.
Ha kane ka prokram yn ïalam da u Apostol Ankit Sajwan bad yn ïashim bynta da ki nongïalam bad ki nongkren Khristan na ka Jylla Meghalaya bad kumjuh ruh na kiwei kiwei ki bynta jong ka ri.
Ki jingïalang kin kynthup ïa ki jingduwai bad ki jingïakren kiba pynshong nongrim ha ki longïing longsem, ki samla, ka jingbha jingmiat ha ka imlang sahlang, ka jinglong nongïalam bad ka jingsuk ha ka imlang sahlang, u la ong.
U la pynshai ba kane ka Meghalaya Revival & Healing Festival kan long kaba don jingsuk, ka bym don jingïadei bad ka saiñ hima sima bad ka pdiang laitluid ïa ki paidbah. “Baroh ki kam yn pynlong da kaba burom ïa ka jingpher jong ka kolshor bad ka imlang sahlang jong ka Meghalaya. La khmih lynti ïa ka jingïashim bynta na ki bynta bapher-bapher jong ka Jylla bad ki thaiñ ba marjan,” la bynrap u Bah Crosslin.
Nalorkata, u la ong ba ïa ki jingtip ba bniah ha kaba ïadei bad ka prokram, ki nongkren bad kiwei-kiwei ki jingpynbeit, yn sa pynbna ha ka por kaba biang.
