Shillong, K’Lyngkot 06
Ka ïingbishar Special Judge (POCSO) ka East Khasi Hills jong ka Kong MK Lyngdoh, ka la hukum ban set phatok haduh 25 snem ïa uwei u briew ba la tip kyrteng kum u Rocky Mawlong ba la 42 snem namar ka jingleh beijot ïa ka khynnah hynñiew snem ha u snem 2020.
Ha ka hukum ba la pynmih ha ka 17 tarik Nohprah, 2025, ka ïingbishar ka la ong, “Une u nongleh bymman u dei uba la shah set hapoh ka Judicial Custody haduh 3 snem 5 bnai katba nang ïaid ka jingbishar”.
“Une u nongleh bymman u dei ban nang shong phatok sa 21 snem bad 7 bnai, namar ka jingleh beijot ïa ka khynnah, kaba long 25 snem ka jingset phatok baroh lang,” ong ka ïingbishar ha ka hukum.
Ïa kane ka case la tohkit da ka WPSI L Kharjana kaba don mynta ha Women Police Station, ka East Khasi Hills, Shillong. Kane ka dei kaba la register hapoh ka thanad Mawngap hapoh ka kyndon 5(m)(n)/6 POCSO Act.
