Shillong, K’Lyngkot 06
Ki pulit ka East Jaiñtia Hills ki la pynngat mukotduma ‘suo motu’ hadien ka jingïap jong uwei u briew halor ka jingkynnoh bthei bom ‘dynamite’ hapoh ka distrik.
U Superintendent of Police, u Vikash Kumar ha ka Sngi Ba-ar u la pyntikna ba une u briew uba la tip kyrteng kum u Ashok Tamang u la khlad noh namar ki jingmynsaw na ka jing-ing hapdeng ka jingsumar ha Shillong Civil Hospital.
U la bynrap ba la pynngat mukotduma ‘suo motu’ hapoh ka kyndon 105 jong ka Bharatiya Nyaya Sanhita (BNS) halor katei ka jingjia.
“Da kaba pynshong nongrim ïa ka jingpyntip hashuwa ban ïap (jong u Ashok Tamang)…ngi la pynngat ïa ka mukotduma ‘suo-motu’ hapoh ka 105 BNS,” u la ong.
U Kumar u la batai halor ka jingtohkit kaba dang ïaid shakhmat bad ong, “Katba dang ïaid ka jingtohkit, ngin sa tip hangno ka jaka trei jong u ka don bad ha kano ka jinglong-jingman kaba u trei.”
U la pynshai shuh-shuh halor ka jingpyntip hashuwa ban ïap jong u Tamang da kaba ong, “Ha ka jingpyntip jong u shuwa ban ïap, u la pynpaw (hakhmat ki doktor) ba u dei uba khmih ïa u ‘dynamite’ ha ka jaka trei jong u, hynrei um shym la batai tikna ïa ka jaka ne ki jinglong-jingman. Um shym la kdew satia ïa ka jingtih dewïong; u la shu ong ba ka jingjia ka la jia ha ka jaka trei jong u.”
Haba kylli, u SP u la ong, “Hooid, ka Justice BP Katakey Committee ka la pan ïa ka kaiphod halor kane ka jingjia. Ngin sa ai lut ïa ki jingtip ba bniah namarba ki don ar tylli kiei-kiei haba ïadei bad kane – ka dur-khih (video) bad ka jingïap jong u AshokTamang. Ngin hap ban bishar bniah baroh arliang namarba kine ki dei ki bynta kiba ïapher.”
Halor ka dur-khih kaba la kynnoh don jingïadei hapdeng katei ka jingjia bad ka shnong Thangsko, u Kumar u la ong, “Katkum ka jingtohkit (ha kaba sdang), kam dei na kata ka shnong…u Rangbah Shnong bad kiwei-kiwei ki dkhot jong ka shnong Thangsko ki la pynpaw ba kim ithuh ïa ki briew kiba don ha ka dur-khih, ïa u nongkren, ne ïa ka jaka. Ngim lah ban pyntikna ba ka jingbthei ‘dynamite’ ka la jia hangta…”
Ka jingtohkit ki pulit ka la lap ba ïa u Tamang la sumar nyngkong ha Sutnga Community Health Centre (CHC) ha ka 23 tarik u Nohprah, 2025 ryngkat ka jingmynsaw namar ka jing-ing. Hadien la phah noh ïa u sha Shillong Civil Hospital, ha kaba u la khlad noh ha ka 1 tarik Kyllalyngkot.
Katkum ka jingong u SP, ka Sutnga CHC kam shym la pyntip satia sha ki pulit halor katei ka jingjia.
La pyntip sha ki pulit tang lyngba ka ‘Police Booth’ jong ka Shillong Civil Hospital, kaba la ïalam pat sha ka jingpynngat ïa katei ka mukotduma.
Ha kajuh ka por, u Kumar u la pyntikna ba ki pulit ki la sdang ïa ka jingtohkit ban pyntikna ïa ki jingshisha bad ki jinglong-jingman ha kaba ïadei bad katei ka jingïap.
