Shillong, K’Lyngkot 06
La pyntip sha ki nongshong shnong ba ka tnad Telecommunications (DoT), Sorkar India ka la shna bad pyntreikam ïa ka rynsan Central Equipment Identity Register (CEIR). Ka rynsan CEIR ka pynsuk ïa ki nongshong shnong ban pyntip ïa ki mobile phone kiba la jah ne shah tuh, ban ïarap ha kaba buddien bad ban ïoh biang ïa ki, bad ïarap ban ïada na ka jingpyndonkam bakla ïa kum kine ki tiar, da kaba kyntiew ïa ka jingshngaiñ jong ki paidbah.
Naduh ba la pyntreikam ïa ka CEIR ha ka Jylla Meghalaya, bun ki nongpyndonkam ki la rejister ïa ki jingujor lyngba ka rynsan ban khang, ban wad, bad ban ïoh biang ïa ki mobile phone jong ki. Haduh ka 06.01.26, baroh ki don 5914 tylli ki mobile phone kiba la ïoh jingtip ba ki la jah ne shah tuh ha ka rynsan CEIR ha Meghalaya. Na kine, haduh mynta, la lah ban wad bad lap biang ïa 1662 tylli ki mobile, kaba pyni ïa ka jingkiew ka jingtreikam jong ka rynsan bad kyntiew ïa ka jingïatreilang hapdeng kito kiba don bynta ha kane ka kam.
Ka rynsan CEIR ka ailad ïa ki nongshong shnong ban ‘block’ ïa ki mobile ba la jah lane shah tuh, ban ïada na ka jingpyndonkam bakla, ban buddien bad ïoh biang ïa ki tiar shisien ba ki paw biang ha kino-kino ki network telecom bad ruh ban ‘Unblock’ ïa ki tiar ba la ïoh biang khlem jingeh lyngba kajuh ka rynsan.
Ka jingjop jong ka CEIR ha Meghalaya ka long kaba ai mynsiem shibun lyngba ka jingïatreilang kaba tyngeh jong ki Telecom Service Provider (TSP), ki bor Pulit ka Jylla, bad ka jingkiew ka jingpynsngewthuh paidbah shaphang ki jingshakri digital ba la ai da ka tnad Telecommunications.
Ka rukom treikam jong ka CEIR kam ïada tang ïa ki jingmyntoi jong ki nongpyndonkam hynrei ka don ruh ka bynta kaba kongsan ha kaba tehlakam ïa ki kam cyber beaiñ ba ïadei bad ki mobile, ban khang lad ïa ka jingkhaïi be-aiñ ïa ki mobile, bad ban kyntiew ïa ka jingshngaiñ jong ka ri ha kam digital.
La kyrpad ïa ki nongshong shnong ban pyntip kloi lada jia ba jah ne shah tuh ka mobile jong ki lyngba ka portal CEIR kaba don ha https://www.ceir.gov.in.
Ka tnad Telecommunications ka dang ïai bteng ban pynïar ïa ki jingshakri digital na ka bynta ki paidbah bad ban pynthikna ïa ka jinglong jingman kaba shngaiñ ha kaba ïadei bad ka kam telecom na ka bynta baroh ki nongshong shnong.
