Shillong, K’Lyngkot 06
Ka Meghalaya Human Rights Commission (MHRC) ka la bthah ban aiti ïa ka kaiphod tohkit kaba bniah hapoh shibnai haba ïadei bad ka jingïap jong ki arngut ki briew halor ka jingkynnoh bthei bom ‘dynamite’ ha ka shnong Thangsko.
Ka kyrwoh na u Secretary ka MHRC, u L. Ch. Marak ha ka Sngi Ba-ar ka la ong, “Ka MHRC ka la shimkhia da ka ‘suo motu’ ha kaba ïadei bad ka jingïap ba sngewsih jong ki 2 ngut ki briew ha ka shnong Thangsko ha East Jaiñtia Hills District…hadien ba la kynnoh ba ka la don ka jingbthei bom ‘dynamite’ ha ka par dewïong ha EJH.”
“Ka Commission ka la phah jingthoh sha u Chief Secretary ka Sorkar Meghalaya, ban ïaid shakhmat bad ka jingtohkit kaba treikam mardor bad ban aiti ïa ka kaiphod tohkit kaba bniah sha ka Commission hapoh shi bnai,” ka la bynrap.
Haduh mynta, la pyntikna ba uwei u briew uba la tip kyrteng kum u Ashok Tamang u la khlad noh. U la khlad noh namar ki jingmynsaw ha ka 1 tarik Kyllalyngkot, 2026, katba u dang shah sumar ha Shillong Civil Hospital.
Ki tyllong khubor ki la pyntip shuh-shuh ba nyngkong eh ïa u Tamang la pynkit sha Sutnga Primary Health Centre ha ka 23 tarik u Nohprah, hashuwa ban phah sha Shillong Civil Hospital namar ka jingjur ka jingmynsaw jong u.
Ïa ka jingpynithuh jong uwei pat ym pat lah ban pyntikna haduh mynta.
