Khliehriat, K’Lyngkot 06
Arngut ki samla kiba la tip kyrteng kum u Tylliangki Muksor, 19 snem bad u Ericson Muksor, 20 snem rta ki la duh ei ïa la ka jingim katba ki dang leit ban ïa jngi ha ka wah Serbi kaba hapoh ka shnong Umrasiang, East Jaiñtia Hills.
Ki pulit ki ïathuh ba ki la ïoh ïa ka jingtip na u Waheh Shnong Musiang Lamare uba la ïathuh ba ka kynhun ki khynnah samla ki la leit ban ïa jngi ha katei ka wah hadien ba kitei ki arngut ki la ngam jyllop noh.
Hadien kane ka jingjia la khot ïa ka jingïarap lem jong ka kynhun SRT ha kaba la ïoh ban sei noh ïa kitei ki met ïap na katei ka wah.
Na ka liang ki pulit ki la pyndep ïa baroh ki jingdonkam kiba ïadei katkum ka aiñ, bad hadien na ka liang kiba haïing hasem jong kine ki lanot ki la leit ban shim ïa ka hukum ban pyllait na ka jingleh post mortem.
