Jerusalem, Kyllalyngkot:
U Myntri Rangbahduh ka Israel, ha ka Sngi Nyngkong u la ong ba ka Israel kan nym ailad ia ki jingthmu jong ka Iran ban wanrah ia ki projek ‘namding namar ka long ka jingma kaba khraw ia ka Israel bad ia ki ri ba marjan kiba don jingiathud bad ka Iran. Kane ka jingmaham jong u Netanyahu ruh ka long tang hadien katto katne sngi ba u President ka US- u Donald Trump, u la pynmih ia kajuh ka jingmaham pyrshah ia ka Iran, kaba thmu ban ïaid shakhmat ia ki prokram shna bad pyrshang pynher ‘namding wat hapdeng ki jingiakynad bad ka Israel.
Namarkata, utei u nongialam ka Israel, u la ong ba ka Israel da lei-lei ruh kan nym ailad ia ka Iran ba kan leh ia katei ka kam ba ka thmu, naba ka long ka jingma kaba khraw haduh katta ia ka Israel bad ia kiwei de ki ri ba marjan bad ka Iran.
Kumta ruh u la maham tyngeh, ba lada ka Iran ka leh pyrshah ia kane ka jingmaham bad lada u ‘namding ka Iran un leit poi shapoh u pud- u sam jong ka Israel, ka Israel kan ym map bad kan pynphai da ka jubab kaba eh shisha, ka ban long ka jingsneng ia ka Iran ba kan thngad syndon ban ïaid lait ia ki jingmaham.
