Pune, Kyllalyngkot:
U heh nongïalam jong ka seng Congress bad u Myntri barim jong ka sorkar pdeng u Suresh Kalmadi u la khlad noh ha Pune ha ka step jong ka sngi Ba-ar hadien ka jingpang kaba la bat slem bha, ong ka khubor kaba la wan na kiba haïing jong u. Une u nongïalam u la khlad ha ka rta kaba 81 snem.
U Kalmadi u la khlad noh ha ka por kumba 3.30 baje eiei mynstep, ong ki tyllong khubor.U la shakri kum u Myntri ka sorkar pdeng uba dei peit ïa ki kam ka tnat Railways bad u dei ruh u president barim jong ka Indian Olympic Association (IOA).
Une u nongïalam u la pawkhmat bha ha ka kam saiñ pyrthei na Pune, u la mihkhmat ïa kane ka nongbah bunsien ha Lok Sabbha. U la bat katto katne ki kyrdan ba kongsan ha ka por ba u dang trei ha ka saiñ pyrthei bad u la don jingïadei bad ka jingpynïaid ïa ki jingïalehkai ha ka kyrdan jong ka ri la bun snem.
Ki nongïalam kiba don ha ki kynhun bapher bapher jong ka seng ki la pynpaw ïa ka jingsngewsih halor ka jingkhlad noh jong u bad ki la ai burom ïa ka jingnoh synñiang jong u sha ka jingim paidbah.U Kalmadi u la iehnoh shadien ïa ka kurim, u khun bad ka pyrsa kurim, arngut ki khun kynthei kiba la shongkurim bad ki pyrsa kurim, bad kumjuh ki ksiew.
Ïa ka met basah jong u la buh ha Kalmadi House kaba don ha ka thaiñ Erandwane hangne haduh ka por 2 baje janmiet, la ïathuh ki tyllong khubor. Bad la leh burom khatduh bad pynkhuid ïa ka met jong u ha Vaikunth kaba don ha Navi Peth ha ka por 3.30 baje janmiet.
