Shillong, Kyllalyngkot 06
Ka Bharatiya Janata Party (BJP) Meghalaya ha ka sngi Nyngkong ka la kyntait ïa ka jingpynsngewthuh bakla ba ka skhim 100 sngi la pynduh noh, hynrei da kaba pynksan ba lyngba kane ka jingwanrah ïa ka aiñ Viksit Bharat-Gurantee for Rozgar and Ajeevika Mission (Gramin) (VB-G Ram G) Act, 2025, kan pynmyntoi shibun ïa kito kiba ïoh ban trei ïa kane ka skhim.
Haba kren sha ki lad pathai khubor, u Bah Wankitbok Pohshna, General Secretary ka BJP Meghalaya ula ong ba kane ka aiñ thymmai ym dei ba kan pynduh noh ïa ka skhim, hynrei lyngba kane ka aiñ kan pynïoh ïa ki nongtrei 100 sngi sha ka 125 sngi jong man ka longïing ha ka shisnem.
Shuh-shuh u la ong, “Ka jingshisha ka long ba kane ka aiñ ka ai lad shuh-shuh ïa ki longïing ha thaiñ nongkyndong da kaba ki nang ïoh bun sngi ba kin trei bad ym shym la knieh noh ïa ka hok jongno-jongno ruh, ha ka jingshisha, la nang pynkhlaiñ shuh-shuh ïa ki”.
Haba pynshai khambha ïa kane ka Act, u la ong ba kane ka skhim 125 sngi kan pyrshang ban kynthup lang ïa kiei-kiei ki ban ïarap ïa ki nongshong shnong, u la ong ba ha ka skhim 100 sngi, kum ka Watershed Management lane Forest Management ka khlem kynthup lang, hynrei ha kane ka skhim ba mynta kine baroh kin rung lang bad ki shnong ki ba pyntreikam kin ïoh jingmyntoi shibun lyngba kane.
Haba ïadei bad ki jingpyrshah ka Congress, u Bah Wankitbok u la ong, “lada phi pyrshah ïa kaba dei nga sngew ïahap, hynrei ka long kaba sngewsih ba phi pyrshah ïa kaei-kaei kaba long ka jingmyntoi ïa ki paidbah bad haba phi pyrshah ïa kaba pynmyntoi ïa ki paidbah, ka long ba phi pyrshah ïa ki paidbah.”
U la bynrap ba kane Act ka pynthikna ïa ka jingsiew bainong ha ka por kaba dei, ban siew bainong da ki kor digital ban ym don ka jingleh thok bad tang kiba dei hok ban ïoh kin ïoh ïa kane ka skhim bad kane kan wanrah ïa ka jingtreikam kaba khuid ba shai.
Ka BJP ka pynrem ïa ka Congress kaba pyrshah ïa kane ka jingwanrah bad kaba pyrshang ban pynsngewthuh bakla ïa ki paidbah haba ïadei kane ka skhim.
