Shillong, Kyllalyngkot 06
Ha kane ka juk kadei ka juk kaba kyrduh kam kyrduh jam haba phai la ka long sha ka kam Sorkar bad kiwei-kiwei de ki kam, hynrei ka kam pat haba trei smat kam ju duh lada ngin pyndonkam hok ïa ka sap ka phong kaba ngi don halade.
Ïa kane ngi lah ban sakhi ïa ka Kong Banalari Kharnaior kaba shong basah ha Jaiaw Lumpyllon, kaba dei ka wei ka longkmie kaba ïeng ha la ki jong ki kjat ban pyndap ha ïing ha sem lyngba da ka kam suh jaiñ man ka sngi ha ïingsah.
Ka Kong Banalari Kharnaior ka ju suh ïa ki jaiñ kiba bun jait ha ïingsah, ba kynthup naduh ki pyrda, sopti khyllung ba shong synran bad kiwei-kiwei de ki jaiñ kiba ka la ju shim man ka por ban suh.
Haba ïoh ban ïakren kyrpang bad u Nongsaiñ Hima ha ka 06 tarik u Kyllalyngkot 2026, ka Kong Banalari Kharnaior ka la ïathuh ba ka la sdang ïa kane ka kam suh jaiñ mynta kumba la 12 ne 13 snem eiei hynrei ka jingnang ban suh ïa ki jaiñ pat mynta ka la ïaid la kumba 10 snem eiei.
Ka la ïathuh ba nyngkong ka jingïaid lynti ka dei kaba eh bha, namar la shu pyndonkam da ka kor kaba rim bad ka long suki bha ban suh jaiñ hynrei da ka jingïai pyrshang man ka sngi mynta ka la ïoh ïa ka kor suh jaiñ kaba bha lyngba ka jingïarap jong u MLA, kata u Bah Adelbert Nongrum.
Haba kylli ka la ïathuh, ba nyngkong eh ka jingïoh jinghikai ka dei na ka Kmie namar ka Kmie ruh ka ju suh jaiñ mynshuwa ha ïing bad lyngba ka jingitynnad ïa ka jingsuh jaiñ jong ka Kmie, kumta ka la pyrshang bad ka la sngewtynnad eh.
“Suki-suki da ka jingpyrshang mynta ka la urlong ba ngan suh jaiñ bad nga la ju pyrshang ruh ban shim ki jaiñ na ki para marjan,” la ong ka kong Banalari.
“Mynta nga la pyrshang ban suh ki jaiñ jong ki briew ba na jngai bad na jan ruh bad jong ki para marjan,da kaba kdew ba ka don beit ka jingbakla namar ka jingnang da kaba pule bad kaba shu nang hi ka long kaba pher haduh katta-katta,” ka la bynrap.
Shuh shuh ka la ong ba lyngba ka jingwanrah jong u Bah Adelbert ïa ka Skill Training ka la ïoh ïa shibun ki jinghikai. Kumta ka Kong Banalari ka la khublei kyrpang ïa u MLA uba la wanrah ïa kane ka training namar kane ka dei ka lad jingïarap.
Haba phai pat sha ka kam Sorkar ka Kong Banalari ka ong “Mynta ka long kaba jynjar ban ïoh kam Sorkar hynrei lada ngi don hi ka buit nalade ngi dei ban pyrshang namar ka dei kaba ai jakpoh bad kaba pyndap ha ïing ha sem. Ka la kyntu ruh ïa ki samla pule bad ki longkmie baroh ban longshlur ban suh jaiñ ne ha kano-kano ka kam ba ki nang ban trei”. Da kaba ong ruh “Lada ngi pyndonkam hok ïa ka sap, ngin nym duh ja”.
Nalorkata, ka la ong ruh ba ka shu ïoh tang malu mala lyngba kane ka kam suh jaiñ ha ïing bad mynta da ka jingïarap jong u MLA ban pynïoh ïa ka kor suhjaiñ kaba biang, ka la long shisha kaba lah ban pyndap pynbiang ha ïing ha sem.
