Shillong, K’Lyngkot 06
Ka jingkhynra ki pulit kaba la ïasnohktilang ha ka shnong Santogre, South West Garo Hills District ha ka Sngi Ba-ar ka la ïalam sha ka jinglap jong bun tylli ki kuli ba la tep ha kawei khlaw ba thung siej.
Kane ka jaka ka hap hapoh ka jingkhmih jong ka Salmanpara Police Station.
“Ka kynhun pulit ka la lap ïa ka jaka buh kuli ba la tep ha kawei ka khlaw ba thung siej ha ka por jong ka jingkhynra. La lap haduh 55 tylli ki kuli ba suba siat liengsuiñ ba dang im (live anti-aircraft ammunition),” ong u heh pulit ka distrik, u Vikash Varma ha ka kyrwoh khubor.
Ïa ki kuli ba la lap, la kurup noh ha katei ka jaka ha ka jingdon lang ki sakhi ba laitluid, da kaba bud ryntih ïa baroh ki kyndon aiñ ba la buh.
“Ka jingtohkit ba bniah ka dang ïaid shakhmat ban pyntikna ïa ka tyllong jong ki kuli bad ban pynithuh ruh ïa ki briew kiba donkti ha kane ka kam be-aiñ,” bynrap u Varma.
Na ka liang u SP u la kyrpad ïa ki paidbah ban wan shakhmat lada ki don kino-kino ki jingtip kiba ïadei bad ki runar kiba donkti ha ki kam be-aiñ.
“Ïa kum kine ki jingtip lah ban ïasam bad ki thanad kiba jan tam. Ïa ka jingithuh jong ki nongpyntip yn buhrieh, bad yn ai ruh ïa ka buskit kaba biang,” u la pyntikna.
