Ka long kaba donkam ban long kiba phikir haba leit kai shajan ki wah ne thmu leit jngi namar teng teng ka lam pynban sha ki jingjia ba sngewsih. Dang ha kine ki sngi, la sakhi lyngba ki kor Facebook, ba ki la don kiba la sahkut bad ngam jyllop ha kawei ka wah haduh ba la hap ban wan da ki bor pulit ban sei ïa kiba sahkut bad duh ei ïa la ka jingim bad kum kine ki jingjia ki long shisha ka jingduh ka bakhraw ïa ka ïing ka sem bad ka imlang-sahlang.
Ha kum kine ki por ba dang sdang u snem thymmai, ki don bun ki nongshong shnong kiba smat ban leit kai bad leit bam khana shajan ki wah ban lehkmen bad leh sngewbha. Hynrei ki dei ruh ban kynmaw ba ka jingtur shajan jong ki wah ne ban jngi ka don la ki jong ki jingma lada ngim phikir. Ngim kwah ban ïohi ïa kiba kum kine ki jingjia ba sngewsih. Tang kiba duh kin sngewthuh ïa ka jingkthang ka mynsiem. Namarkata, ki kmie ki kpa bad ki bahaïing hasem kiba la kham heh kham san ki dei ban peit, sneng bad kyntu ïa ki khynnah lane ïa kiwei pat ba kin kiar na ka jingleit shajan jong ki wah ne ban leit jngi sha ki wah lane sha ki bynta jong ki wah kiba don jingma. Ki khynnah ruh ki dei ban pyrshang ban kiar na ka jingleit jngi ha ki jaka kiba lah ban don jingma da kaba kylli pyrthew shwa na kiba la heh la san bad kiba kham don ïa ka jingtip halor ki wah.
Ha kajuh ka por, ka long ka jingkyntu ïa ki shnong ki thaw bad ki skul ba kin hikai ïa ki khynnah khnang ba kin nang ïa ka rukom kaba dei ha ka ban jngi. Dei ruh ban hikai ïa ki kumno ban pyllait im ïa kito kiba la jan ngam jyllop khlem da buh jingma ïalade. Kiba kum kine ki jait jinghikai ki long ki bakongsan. Katno kan long ka jingkyrkhu lada ngi lah ban pyllait im ïa kiwei kiba don hapdeng ka saw ka sian. Nalor ka jingpule kot pule sla bad ka jingïoh ïa ka jingnang jingtip, ki khynnah ki dei ruh ban nang ïa kiwei pat ki jingdonkam ha ka jingim jong ki khnang ba ynda ki la heh la san, kin tip kumno ban ïada ïalade bad ïa kiwei ruh kumjuh. Tang ka jingtip ha ka jingstad pyrthei kam pat biang. Ha kane ka pyrthei mynta, ki don shibun ki jingdonkam ba hap ban nang bad kan bha shibun lada lah ban hikai bad pynsngewthuh lypa ïa ki khynnah naduh ka rta ba ki dang lung. Lada ïa kiwei ki jait jingïalehkai (Sport) la ju pynlong da ki skul, kan bha lada kiba kham bun na ki skul ki pyrkhat bad ailad ïa ki khynnah ba kin nang ha ka jngi.
Ngi kyrmen ba nangne shakhmat, ki jingjia ba sngewsih ha um ha wah namar ka jingleit jngi kin ym jia shuh bad kane kan urlong tang lada ngi long kiba phikir bad husiar. Lada ngi ïa long phikir lang, ngin lait na ka jingduh ïa ki mynsiem briew. Ngi dei ruh ban ïa peit lem iwei ïa iwei pat haba don sha lum sha wah khnang ba ki kam sngewbha kin ym ïalam sha ka jingsngewsih. Ha kajuh ka por, ngi kyrmen ba kiba kham bun na ki skul kin shimkhia ban ai jinghikai ïa ki khynnah ki jong ki ha ka liang ka jngi khnang ba hadien habud kin lah ban ïada ïalade bad ban ïarap lem ïa kiwei kumba long ha kiwei ki jingïalehkai kiba tei ïa ka met ka phad bad kumjuh ruh kiba pynkhlaiñ ïa ka jingmut jingpyrkhat.
