Shillong, K’Lyngkot 06
Ki pulit ka Jylla bad ki bor pahara khappud (BSF) ki la pynjur ïa ka jingpahara lang ha shi lynter u khappud bad ka ri Bangladesh, ha East Jaiñtia Hills District.
“Ka jingpahara lang bad ka kynhun shipai BSF ha ka thaiñ Huroi, Hingaria,” ong u SP ka East Jaiñtia Hills u Vikash Kumar ha ka sngi Ba-ar.
Katkum ka jingong jong u, ka jingpahara lang ha khappud Indo?Bangladesh bad ki shnong ba marjan ka dei shi bynta jong ki lad jingïada kiba kham biang haba peit ïa ka jinglong jingman kaba don bad ka ri ba marjan.
Ka jingtreikam ka kynthup ruh ïa ka prokram pynsngewthuh paidbah ha baroh ar tylli ki shnong, da kaba kyntu ïa ki nongshong shnong ban kiar na ka jingïaid lynti khlem da donkam hajan ki “zero point,” khamtam ha ka por miet.
Ha ki jingïalang bad ki nongsynshar shnong, ki Secretary, bad ki President jong ki seng ïada shnong (VDP), ki la pyntip sha ki nongshong shnong halor ka jinglong jingman ha ri Bangladesh mynta bad ki la pynksan ïa ka jinglong ban husiar.
“Ngi peit ha baroh ki liang, ka jingpahara bad jingpeit bniah man ka sngi ka long ha kine ki jaka,” ong u Vikash Kumar haba pynksan ïa ka jingdonkam ban tehlakam ïa ki kam be-aiñ kiba ïaid lait na u pud.
