Raphael Warjri
Ka ktien thung wait tasam ka dei ka smai ka spot halor ka jingjia kaba la palat liam ki kam ne ki ktien kiba pynkthang haduh ba ym lah shuh ban dang ïaishah, ne ban dang ïa mab, kumta la ong da ka thung wait tasam. La ïathuh ba mynnor ka don ka jingjia ba arliang ki kyntoit shnong ba marjan ki la ïa leit sha ka tamasa da kaba biria bad byrngia laiphew jait laiphew rukom. Hynrei ha kata ka lehkmen, la jia ryngkhat ba don ka rukom leh biria na kawei ka liang kaba long pyrshah ïa ka jingsngew jong kawei pat ka liang. Kata ka jingjia ka long kaba la ïa atnud haduh katta katta ba uwei na ki longsan mansan na ka liang ba shah siat pharshi da ki ñia kiba sngew kynduh ha dohnud bad ki ba thad rong ïa la ka kyntoit shnong, kumta u la shim la ka wait bad thung ha khyndew ban bam smai artat ba yn ym ïadei shuh bad kata ka liang jong kawei pat ka kyntoit shnong. Naduh kata la mih ka kyntien thung wait tasam.
Ka ktien khun kbeit shapuloit, ka dei ba sin ïa ki khyllung khynnah ki ba dang rit ka karta bad dang lung ka pyrkhat pyrdaiñ, hynrei ki pyrshang ban tynneng ban ïa kyrshut tyrpeng bad ki rangbah ha kano kano ka jylli ne lympung ki kynrem lyndan. La ïathuh ba ki khun kbeit kiba rit ria ba ki ju marmlien ban her hapdeng ba don kiwei kiwei ki sim baheh kibapher bapher ha ka mariang. Kine ki khun kbeit ki ju her marjan jong manla ki sim baheh kum ban pynwit pynthut ïa ki. Lehse ki longshwa manshwa ki la khmih shaiñ ïa kane ka rukom leh jong ki khun kbeit bad ki sa pynïasyriem kum kita ki khynnah rit kiba tynruh ïa lade ban leit hakhmat hakhmat sha ka lympung ki rangbah kum kiba nang kiba tip.
Ka ktien bam hati kit kulai, ka dei ba ong ïa ki briew kiba trei ban kamai jakpoh kat ban biang ha la ka longïing longsem, hynrei kiba im sahuh palat na kaba ki kamai. Kane ka dei kaba la khmih shaiñ da ki longshwa manshwa ïa ka rukom long jong ki mrad ba ri ki briew. Ki longshwa manshwa ki iohi ba ki hati ki lah ban kit borbar ïa ki tiar ki tar ki mar ki mata palat ban ïa kino kino ki mrad ba ju ri ki briew, hynrei ki kulai ki dei ki mrad kiba shu kodom lehkmen ha madan madiah bad ki shu kit kai malu mala, haba ïa nujor bad ki masi lur kiba lur lyngkha baroh shisngi. Ha kane ka rukom lehse ki pynïasyriem ïa ki briew kiba khlem da lah ban kamai katta katta, hynrei ki pynlut ksan bad leh sahuh ha la ka jingim.
Ka ktien langwyrku sang khyndew, ka dei ba sin ïa ki briew kiba kiar bad khohñioh ban ïa rop rop para bynriew ha ka imlang sahlang, haba ïalade pat ym pat dei kiba khraw haduh katta katta ban leh mynleh da kaba kiar raimaw raidieng na la ki para bynriew. Ka langwyrku ka dei ka sim kaba ym bit ban ïuh kjat ha khyndew, namar tang shu ïuh ki kjat ha khyndew kan ym lah shuh ban her, bad long kum ki syiar. Na kata ka daw ki sim langwyrku ki la tip hi ïa kata ha ka jinglong sim jong kiba ki sang ban ïuh kjat ha khyndew. Kumta haba baroh ki jait sim ki her bad hateng hateng ki dem ha sla khyndew, hynrei tang ka langwyrku kaba kiar ban dem ha khyndew. Na kata ka daw lehse ki longshwa manshwa ki khmih shaiñ ïa kata ka jingleh jong ka langwyrku bad pynïasyriem bad ki briew kiba kiar ban leh ïa kaei kaei kaba kiwei kiwei ki para bynriew ki ju leh barabor.
Ka ktien sim tyngwieng die kmie, ka dei ïa ki khun kiba tamsneng bad ym ñiewkor shuh ïa la ki kmie ki kpa, bad kiba kloi ruh ban len ïa la ki kmie ki kpa hakhmat ka imlang sahlang, nalor ba ym salia wat ban ïuhroit ne ban leh tohmet ïa ki. La ïathuh ba u sim tyngwieng u dei u jait sim ba ynda la san u ju puh ïa ka kmie lajong bad her kat sha ba mon khlem suitñiew shuh lada jia eiei. Lehse ki longshwa manshwa kiba khmih shaiñ ïa kata ka rukom leh jong u sim tyngwieng ba ki sa pynïasyriew ïa ki khun tamsneng kiba kloi ban ïuhroit ïa la ki kmie ki kpa lajong bad ban ïaid leh meng ha ka imlang sahlang.
Ka ktien sim laidieng, ka dei ïa ki briew kiba kloi lan ban rah ktien na kawei ka thliew ïing sha kawei pat ba teng teng lah ban dei da ki ñia shu thaw ba ym dei katkum ka jingshisha, tang ban balia siang sdieh ha man la ka jylli ba ki leit kren balaiñ talaiñ. Ka ktien sim laidieng te ym dei kino kino ki sim, hynrei dei ba ki longshwa manshwa ki la thaw hi ïa ki sim kiba kyntiap na kawei ka dieng sha kawei pat ban tyngkhap bad ki para sim la pynïasyriem kum kita ki briew kiba rah ktien nawei shawei ha la ka thaw ktien laiphewjait.
Ka ktien mrad lakia, ka dei ïa ki kynja riewkai kiba ym ler eiei ha ka imlang sahlang, hynrei kiba khluh ban wan tuklar da ki ñia kiba per. Ïa ki briew kiba mar-mlien ban tynruh rak rak ha ka jylli jong ki riew don burom ban mushlia ne tuklar da ki ñia kiba per, la ju sin da ki mrad lakia.
