Visakhapatnam:
Ha ka sienjam kaba rai ban kyntiew ïa ka jingshngaiñ ha surok bad ban pynduna ïa ka jingjia aksiden kaba shyrkhei kaba ïadei bad ki thuk thuk, ki pulit jong ka nongbah Visakhapatnam ki la pyntreikam ïa ka jingthmu ‘No Helmet-No Petrol’ ha kylleng ka nongbah, kaba la sdang naduh ka 1 tarik u Kyllayngkot, 2026.
Ka jingthmu ka bthah ba ki jaka theh umphniang kim dei ban ai umphniang sha ki nongñiah thuk thuk ki bym deng helmet.
Kane ka sienjam ka dei shi bynta jong ka jingpyntreikam kaba kham tyngeh ban pynrung ïa ki jinglong ba kitkhlieh ban shong kali bad ban pynduna ïa ki jingïap jong ki briew ha ki surok khamtam ha ki jaka sor.
Haba ïakren bad ka lad pathai khubor, u Commissioner of Police u Shanka Brata Bagchi u la ban jur ba kane ka jingpyntreikam ka thmu ban pynsngewthuh ïa ki paidbah bad ban pynbor ban bud ryntih ïa ki kyndon ba kongsan jong ka jingïada.
“Ka kyndon ‘No Helmet-No Petrol’ kam dei tang ka kyndon, ka dei ka lad ban ïada ïa ka jingim. Ngi kwah ban pyntikna ba baroh ki nongñiah kali arshaka bad kiba shong ha ki kin ïoh jingïada,” u la ong.
Hadien kata, u Bagchi u la ban jur ba ki helmet ba la phong da ki nongñiah kali ki dei ban long kiba la pynskhem da ka BIS (Bureau of Indian Standards) bad don ruh ïa ka dak ISI, katkum ki kyndon jong ka jingshngaiñ jong ka ri.
U la kdew ba katto katne ki jaka theh umphniang ha kylleng ka Visakhapatnam ki la dep ban buh ïa ki sainar ba kyntiew ïa ka jingpyndonkam helmet bad kyrshan ïa ka jingbthah bathymmai.
“Ngi kyntu ym tang ïa ki nongñiah kali hynrei wat ïa kiba shong hadien jong ki nongñiah ïa ki kali arshaka ba kin deng ïa ki helmet. Ka jingshngaiñ jong ki ruh ka long kaba kongsan kumjuh,” bynrap biang u CP Bagchi. Katkum ka jingtip ba la pyllait da ki pulit jong ka nongbah, ka Visakhapatnam ka don 1,086 tylli ki jingjia aksiden surok ha u snem 2025.
Ki la don 333 ngut ki briew kiba la mynsaw jur, kaba la pynlong ïa 349 ngut ban ïap, katba 753 ngut ki bym mynsaw jur, kaba la pynlong ïa 1,038 ngut ki briew ban mynsaw. Tang ka surok National Highway 16 ka la don 149 ngut kiba ïap bad 388 ngut kiba mynsaw.
Ha baroh u snem 2025, ki pulit pynïaid kali ki la pynlong bun tylli ki jingpyntreikam kiba kyrpang ban pynshitom ïa ki nongpynkheiñ ïa ka Motor Vehicles Act.
Wat hapdeng kine ki jingpyrshang, ka jingbym kohnguh ïa ki aiñ ha kaba ïadei bad ka jingdeng ïa ki helmet ka dang long ka jingeh kaba ïai bteng, kaba la pynlong ïa ka jingdonkam ban pynjari ïa ki lad pynjari kiba kham pyrkhing.
U Additional Deputy Commissioner of Police (ADCP) u K Praveen Kumar u la ong “Ngi la pynmih ïa ki jingbthah kiba shai sha baroh ki trai Petrol bunk bad ki nongpynïaid, wat ai umphniang ïa kino kino ki nongñiah thuk thuk ki bym deng helmet.
Lada lap ba ka jaka theh umphniang ka pynkheiñ ïa kane ka kyndon, kin ïoh ar tylli ki jingmaham.
Ka jingbteng ban ym kohnguh kan wanrah ïa ki jingpynbna ba pura na ka tnad pulit,” u la ong. Hadien kata, u Kumar u la pynpaw ba wat hapdeng ki jingpeit bniah man ka por, ki kuna, bad wat ki jingshah pynsangeh treikam ïa ki License, ki jingpynkheiñ ki dang ïai bteng ban pyntip.
Ki pulit ki la thmu ban pynlong ïa ki jingpynsngewthuh paidbah ha ki skul, ki kolej bad ki jaka paidbah ban hikai bad pynsngewthuh ïa ki nongshong shnong halor ki kyndon ba ïadei bad ki helmet.
