Shillong, K’Lyngkot 07
Ka Voice of the People Party (VPP) ka la pynpaw ïa ka jingsngewkhia halor ka jingïadei jong ka Sorkar Jylla bad ka HNLC ka seng kieng atiar kaba la shah kheiñ beaiñ, hadien ki jingbyrngem ba katei ka seng ka la pynmih pyrshah ïa ki nongïalam ka VPP.
U nongaiktien ka VPP u Dr. Batskhem Myrboh u la ong, “Ngam tip ïa ki jingïahap hapdeng ka Sorkar bad ka seng… Haba ka seng kaba dei ka HNLC ka la byrngem ban leh eiei pyrshah ïa ki nongïalam ka VPP, ym don uwei ruh na ka Sorkar ki ban pynrem jur ïa katei ka jingkren.”
U Dr. Myrboh u la pynpaw ba imat ka HNLC ka la don ka jingïadei bad ki riew saiñ pyrthei da kaba kdew na ki khubor kiba dang shu mih shen.
U la ban jur ïa ka kamram jong ka Sorkar Jylla ban pynneh ïa ka suk ka saiñ, bad ka jinglong kaba shongsuk bad shongsaiñ ha ka Jylla.
“Ka dei ka kamram jong ka Sorkar Jylla ban pynthikna ba ka jinglong jingman bad ka jingsuk kan ïai neh hapoh ka Jylla,” u la ong.
Ha kaba ïadei bad ka jingbym lah jong ka jingïakren ïasuk hapdeng ka Sorkar bad ka HNLC, u Dr. Myrboh u la kyntait ban kren ne kynthoh eiei, da kaba ong, “Ngam tip, ngam lah ban kren eiei halor kane ka kam namar ba ki la jop ban ïakren bad kawei pat lane kham bha ban ong ba ki dang ïashim bynta ha ka jingïakren bad kawei pat ka seng ba la shah khang, hynrei balei kim lah ban ïakren bad ka HNLC, ngam tip.”
“Hynrei kaba ngi donkam ban pynpaw ka long ka jingsuk, ka jinglong jingman kaba shngaiñ bad kaba jai jai namar khlem ka jinglong jingman kaba suk ba saiñ ngin nym lah ban ïoh ïa ka roi ka par, ngin nym lah ban kiew shaphrang,” u la ban jur shuh-shuh.
