Mawkyrwat, K’Lyngkot 07
Ka Synjuk ki Rangbah San Shnong Manad Area (SRSSMA) ka la pynpaw ïa ka jingsngewkhia kaba jur halor ka jingbym shimkhia jong ka tnad MeECL Mawkyrwat Division ban maramot noh ïa ki post light kiba la sarang bad sator kiba pynsyier ïa ka ïaid ka ïeng ki paidbah khamtam ha ka aiom slap bun na ki longïing ki hap ban sah sha ki ïing ki para marjan namar ka jingtieng ïa ki sainar kiba kem ding ha ka por ba jur ka lyer.
Katkum ka kyrwoh khubor na u Bah Redy Shylla, President SRSSMA bad na u Myntri Shnong Manad Bah H Lyngdoh ki la ong ba la jan dap 40 snem ka jingwan buh ïa ki post light ha kane ka thaiñ hynrei kaba sngewsih ka long haduh mynta kam pat la don kata ka jingmaramot ïa kine ki post light.
Shuh shuh ki la ong ruh ba ka ophis wat na Shillong ruh ki ophisar ki kloi bha ban wan hiar sha kine ki shnong ban wan shna bad peit ïa ki meter ha ki ïing briew bad don ruh ki bnai ba ki shu shna bill light napoh ophis khlem da wan leh reading ïa ki meter.
Ki shnong ki ju ujor man ka por ha ki lineman hynrei kim ju patiaw ne sngap ïa ka jingujor ki paidbah.
Kumta ki la kyrpad na ka Sorkar ba kan shimkhia lem ïa kine ki thaiñ nongkyndong kiba shah leh shiliang khmat ha ki nongtrei ka ophis.
Ki la pynpaw ruh ba ka ophis ka smat tang ban lum pisa bai bnai hynrei ban pynlut pisa na ka bynta ka jingshong shngaiñ ki paidbah kam don bad buh jingkylli ba katno tyngka ka ophis ka la siew bai lutksan ne ïarap ïa kiba la mynsaw lyngba kine ki sainar ilektrik ba noh synjor ha kaba ki la don kiba la duh noh ïa ki kti bad kiba la duh noh ïa ka jingim ruh?.
Kumta na ka liang ka Synjuk ka dawa na ka tnad MeECL ba kan shimkhia lem ïa kine ki jingeh jong kane ka dong ka thaiñ ban maramot kloi ïa ki post light kiba la sarang bad ban pynkynriah noh ïa ki post light kiba don marjan bad ki ïing briew namar ka buh jingma jingsyier ïa ki paidbah.
Ka Synjuk ka dawa ruh ïa ki lineman kiba dei peit ïa kine ki thaiñ ba ki dei ban don ha kine ki shnong ym ban sah ha kiwei ki jaka kiba jngai na kane ka thaiñ khamtam ha ka por lyiur namar lada don jingjia eiei kaba kyrkieh kan nym buh jingeh ïa ki paidbah.
