New Delhi, K’lyngkot:
Ka kynhun jong ki samla pule ha Jawaharlal Nehru University (JNU) ka la pynlong ïa ki jingïakhih da kaba pyrta da ki sur ba jam pyrshah ïa u Myntri Rangbahduh ka ri u Narendra Modi bad ïa u Myntri ka tnat ki kam pohïing jong ka sorkar pdeng u Amit Shah hadien ba ka Supreme Court ka la kyntait ban ai jamin ïa u Umar Khalid bad u Sharjeel Imam ha ka mukotduma thmu pynkulmar ha u snem 2020.
Katkum ka durkhih, kaba la paw, la ong ba katei ka jingïakhih ka la long ha ka miet jong ka lah sngi U Blei hapoh ka jaka pule.
Ka Aditi Mishra, president ka JNU Students’ Union, ka la ong ba man u snem, ki samla pule ki pynlong ïa ka jingïakhih ban pynrem ïa ka jingshah thombor kaba la jia ha ka phyllaw jong ka skulbah ha ka 5 tarik Kyllalyngkot, 2020. “Baroh ki jingpyrta ba la pynmih ha ka jingïakhih ki dei kiba don jingmut bad kim thombor ne ktah matïong ïano ïano ruh”, la ong ka Mishra.
Ka JNU ka la pan ban mudui ïa ka ejahar halor ka jingkynnoh ba ka la pynmih ïa ki jingpyrta “pynkhihwin” hapoh ka jaka pule jong ka skulbah, la ïathuh ki heh jong ka varsity.
Ka shithi jong ka bor synshar sha ki pulit jong ka Delhi ka ong ba ki katto katne ki samla pule ki la pynmih ïa ki jingpyrta “kiba pynrem jur, kiba ktah bad kiba pynkhihwin” bad ki long kiba la ktah ïa ka SC.
Ki Myntri na Delhi, u Ashish Sood bad u Manjinder Singh Sirsa, ki la pynrem jur ïa katei ka jingjia bad kynnoh ïa ka Liang Pyrshah, ba ka kyrshan ïa kito kiba pynleit jingmut ha kum kitei ki kam.
