Shillong, K’Lyngkot 07
U khlieh nongïalam ka Congress, u Bah Vincent H. Pala, u la pynpaw ïa ka jingmaham halor ka jingthmu ka Sorkar ban pynrung ïa ki kyndon kiba ïasyriem kum ka Inner Line Permit (ILP) ha ka aiñ thymmai – Immigration and Foreigners’ Act, 2025 (IFA), da kaba ong ba ka dang kloi than eh ban kren eiei khlem da ïohi shuwa kaei kaba thoh ha katei ka aiñ.
“Ngi pdiang sngewbha ïa ka lada ka ïada ïa ka bha ka miat jong ki briew, hynrei tad haduh ba ngin da ïohi ïa kaei kaba la ong ha ka aiñ, ka dang kloi eh ban ong eiei,” la ong u Bah Pala, da kaba ban jur halor ka jingdonkam ban ïakren bad khmih bniah paidbah.
“Ka lah ban long kaba bha ne ka lah ban long kaba sniew, ngim lah ban ong eiei tad haduh ba ngi ïohi shuwa ïa ka jingtyrwa. Haba ki thaw ïa ka aiñ, kin hap ban ïakren bad ki paidbah ne kin pynsngew sha ka Law Commission ban thaw ïa ki aiñ. Ka dei ka aiñ Sorkar Pdeng; yn ïakren ïa ka kumba ju long. Kumta, ngin sa peit aïu ki jingthoh ha ka aiñ ki ong, nangta ngin sa lah ban ong,” u la bynrap.
Haba kylli ba ka Sorkar Jylla ka la dep mynjur ïa ka rai ban pyntreikam ïa ka ILP ha u snem 2019, u Bah Pala u la ong, “Kata ka dei ka rai tang ban pyntreikam hynrei phi hap ban shna ïa ki kyndon, hap ban shna ïa ka aiñ. Ka rai ka dei ka rai kaba tang shi sla hynrei ka aiñ ka hap ban long na kaba kin shim. Nga tharai kan dang kloi eh ban ong khlem da ïohi shuwa ïa ka jingtyrwa.”
La ka seng ka sngewhun ne em ïa ka rukom treikam jong ka Sorkar Jylla haba ïadei bad ka jingwan rung kyrthep bad ka jingwan rung be-aiñ, u Bah Pala u la kynthoh ïa ka BJP bad NPP namarba kim shym la lah ban pyndep ïa ki jingkular, da kaba pyni ïa ki aiñ tih dewïong bad shalan mrad kum ki nuksa.
“Ka BJP bad ka NPP ki la pulom ha man ki liang. Kum ka nuksa, ha ka ‘Manifesto’ ki la ong ba kin ailad ban tih dewïong hynrei haduh mynta kim pat leh satia. Nangta ki thaw aiñ kumno ban sangeh shalan masi ne mrad shane bad na kata, ki pyndik pat ïa ki paidbah,” u la ong.
Shuh shuh u Bah Pala u la pynpaw ïa ka jingbym shaniah ha ki jingthmu jong ka BJP bad ong, “Nga tharai kin thaw ïa ka aiñ kaba kyrshan ïa la ka jong ka jaidbynriew bad kaba pynlong sohpdung ïa kiwei pat.”
