Ki kynbat ba ai ka Meimariang ki dei ki dawai bah na ka bynta ka jingkoit jingkhiah jong ngi ki briew. Kum u sying, u piat, u shynrai, u rynsun, u sohmrit khlaw, nalor ki jait soh kum sohkwit, sohnairiang bad kiwei kiwei, ki dei ki dawai bah na ka bynta jong ngi ki briew. Don bun ki jait ki kynbat kiba long dawai ba lah ban pynjem ïa kiba pait shyieng, pangmat bad kiwei kiwei.
Ki don ki jait thied dieng bad ki snep dieng kiba long dawai haba sumar ïa kiba bun ki jait jingpang jong ngi ki briew. Nangta ki don ki jait kynbat kum u Jyrmi soh masem, u long u dawai ban pynjem ïa ka jingpang ñiangkhnap ki Masi. Don ruh ki jait kynbat kum u khariew u long bih bad pynïap ïa ki dohkha haba shoh hapoh um. Don de u jait phlang ne uba khot u Jyrhap u long u jait kynbat ba long bih haba ki Masi ki ioh bam ïa u ki siep ka kpoh bad ki mih tyrhoh na ka shyntur bad ki ïap noh. Don bun ki jait kynbat ba ka Mei mariang ka pynmih ki long kiba lah ban pynjem ïa ki jingpang ba bun jait kum ïa kiba shah puh bseiñ, thar ki shniuh khniang, bad kiwei kiwei ki lah ban jem. Ka Mei mariang ka long kum ka thiar buh jingbam jong u khun bynriew.
C. B. Iawphniaw
