Washington, K’lyngkot:
U President ka US, u Donald Trump, ha kane ka kynti u la pynpaw ba u kwah ia ka President ba shipor jong ka Venezuela- ka Delcy Rodriguez, ba kan pyndkut noh shi syndon ia ka jingiatreilang bad ka jingiadie- iathied bad ka China, Russia, Iran bad ka Cuba hashwa ba ka US kan ailad ia katei ka ri ba kan shalan biang kham bun ka umphniang jongka.
Namar la ong ba ka sorkar jong u Trump, ka kwah ia ka Venezuela ba kan iatreilang met bad mynsiem bad ka US haba iadei bad ka jingkhaii umphniang bad ban kham ailad ia ka America haba iadei bad ki tyllong umphniang.
Ka Venezuela, ka don hapdeng ka jingkulmar ha ka sain pyrthei, naduh ba ka US, ka la hiar thma ia katei ka ri, ha ka taiew ba ladep, ha kaba u President ka Venezuela, U Nicolas Maduro, u la shah kem bad shah kit da ka liengsuiñ shabar ri. Katba ka Delcy Rodriguez pat, ka la shimti ia ka shuki ba thylli jong u, kum ka President ba shipor jong ka Venezuela naduh katei ka por, hynrei na ka liang jong u Trump, u la kam trai ba dei ma u, uba synshar ia katei ka ri jong ka South America naduh ba la weng ia utei u nongialam jongka.
Mynta, la iathuh ba ka sorkar jong u Trump, ka la bthah ia ki nongialam ba thymmai jong ka Venezuela, ba ki lah ban shah tang ban tih shuh shuh ia ka umphniang, na ki jaka buh umphniang jong ki, tang lada ki bud ia ki kyndon bad jingbthah jong u Trump.
“Nyngkong eh, ka Venezuela ka dei ban kyntait noh ia ka China, Russia, Iran bad ia ka Cuba bad ban pynkut noh shi syndon ia ka jingiadei ha ka khaii- pateng kaba long ka jingkyntiew ia ka ioh- ka kot jong kitei ki ri kiba iatreilang badka. Kaba ar pat ka long, ba ka Venezuela ka dei ban mynjur ban iatreilang tang bad ka US ha kaba iadei bad ka jingpynmih umphniang bad ban ai jingmyntoi ia ka America haba die ia ka umphniang ba bun.”
Hynrei la ong ba kane ka jingdawa jong ka US ha kane ka por, ka la wanrah jingeh shibun eh ia ka Venezuela namar ba ka China ka dei ka paralok nongkhaïi ba jan tam eh jong ka Venezuela bad ka dei ka nongthied umphniang kaba heh tam jongka.
