Mumbai, Kyllalyngkot:
U Vice President jong ka seng Congress ha Maharashtra, u Hidayatullah Patel, uba la shah shoh bad shah dung ha kawei ka jaka mane blei jong ki Muslim ha Akola distrik, ula khlad noh ha ka por ba shah sumar ha ka step jong ka sngi Balang, ong ki pulit.
U Patel (66) u la shah thombor da ka tiar pynmynsaw kaba nep ha u nongthombor, ha kaba la kynnoh ba ka la long na ka daw ka jingïabuh shun kaba rim bad slem bha ha ka por kumba 1.30 baje mynstep jong ka sngi Ba-ar hadien ba u la leh Namaz ha kawei ka Mosque ha ka shnong Mohala kaba don ha ka thaiñ Akot jong ka distrik, la ïathuh ki pulit.
Une u President barim ka Congress ha ka distrik u la mynsaw na ki bynta jong u ryndang bad ka shadem kaba la pynlong ïa u ban jur ka jingmih snam.
La pynkit mar mar ïa u sha kawei ka hospital shimet ha Akot bad la pynthiah ïa u ha ka jaka sumar ba kyrpang jong ka ha kaba u la khlad noh ha ka step jong ka sngi Balang, la ïathuh uwei u heh pulit.
Katto katne ki durkhih kiba pyni ïa u Patel ryngkat bad ki jaiñ jong u kiba la satah da ka snam katba u dang mih na ka Mosque ki la saphriang bha ha ki lad pathai khubor Social Media.
U Patel, u don ha Jama Masjid ha Mohala, na ka bynta ka jingduwai mynstep, ha ka sngi Ba-ar.
Katba u dang mih na ka Mosque hadien ba u la pyndep ïa ka Namaz, u runar u la thombor ïa u na ryndang da ki tiar ki nep. Hadien kata ki nongshong shnong ki la pynkit noh mar mar ïa u sha hospital, la ïathuh ki pulit.
Ha kaba ïadei bad ka jingjia, ki pulit ki la poi ha katei ka jaka bad ki la lum ïa ki sabut da ka jingïarap jong ki stad ba dei khmih bniah.
La thaw hynriew tylli ki kynhun pulit ban kem ïa u briew uba la tip kyrteng kum u Ubed Khan Kalu Khan ba la tip ruh da ka kyrteng kum u Razik Khan Patel (22).
La kem ïa u ha ka por kumba 8 baje eiei mynstep jong ka sngi Balang na ka shnong Panaj kaba don ha ka thaiñ Akot, la ïathuh u Additional Superintendent of Police u B Chandrakant Reddy.
Hadien kane ka jingjia la pynkhlaiñ bha ïa ka jingpahara ha ka nongbah Mohala bad Akot.
U heh pulit jong ka District u Archit Chandak u dang bishar bniah ïa kane ka jingjia.
Ki pulit kiba treikam ha ki thaiñ nongkyndong jong ka Akot ki la buh jingujor ha kaba ïadei bad kane ka jingjia, la ong uwei u heh pulit.
