Shillong, K’Lyngkot 07
Ka Voice of the People Party (VPP) ka la ther tyngeh ïa ka Sorkar Meghalaya Democratic Alliance (MDA) halor ka jingkynnoh bym larkam bad ka synshar-khadar ba khlem ka jingkitkhlieh.
U nongaiktien ka VPP, u Dr. Batskhem Myrboh u la ong ba ka jingmih jong ka seng ka don jingïadei bad ka synshar-khadar ba bakla jong ka Sorkar MDA.
“Ka Sorkar MDA ba la ïalam da ka NPP ka la long ka bym larkam,” ong u Dr. Myrboh bad bynrap ba ka Sorkar ka “kham pynleit jingmut ban shu pyni nabar bad ban pynbna ban ïa kaei kaba dei ban pynpoi.”
Ha kajuh ka por, u la pynpaw ïa ka jingsngewsih haba ïadei bad ka jingtreikam ka Sorkar, da kaba kdew ïa ka jingnang kiew ka ram bad ki dak jingduna ha ka liang ka roi ka par jong ki paidbah.
Na ka liang u Dr. Myrboh u la buh jingkylli ruh halor ka jingbatai bniah jong ka Sorkar ïa ka roi ka par, da kaba ong ba i-kumba ka pynleit jingmut tang ha ki jingtei, bad kata ruh, ka long tang ha ka liang ki surok ba dang shu dep shna ba la bei tyngka lyngba ki ram.
“Ki surok kiba bha ki dei tang kito ki surok kiba dang shu shna shen lyngba ki ram, hynrei lada phi rung sha ki bynta ba shapoh jong ka Jylla, ka jinglong-jingman jong ki surok ka long kaba i-sangsot,” u la ong haba bynrap “Dang shen, u President ka VPP haba u la leit jngoh ïa ka Ri-lum Garo u la lap ba wat ha kito ki konstitwensi, kiba ngi don ki MLA na ka NPP ruh, ka jinglong-jingman ki surok ka long kaba sniew.”
Shuh shuh une u nongaiktien ka VPP u la pynpaw ïa ka jingbym lah treikam bha jong ka Jylla ha ka ban pynduna ïa ka jingduk kaba bun jait bad kynthoh jur halor ki jingkam ka Sorkar haba ïadei bad ka roi ka par.
“Haba phi kren shaphang ka roi ka par, ha kaba kut, ïa ka roi ka par dei ban thew da ka jingroi jong u briew, bad lada ym don ka jingkiew kaba ïadei bad ka jingroi jong u briew, kata ka jingmut hi jong ka roi ka par kaba ki kren ka long kaba khlem jingmut,” la pynskhem u Dr. Myrboh.
