Shillong, K’Lyngkot 07
U Nongïalam ka Congress ha Meghalaya u Bah Vincent H Pala u la kynthoh tyngeh ïa ka Sorkar MDA ba ïalam da ka NPP bad ba la kyrshan da ka BJP halor ka jingbym lah jong ka ban pynneh pynsah ïa ka suk ka saiñ, da kaba kdew halor ka jingshah pynbthei bom IED ba dang shen jong ka kompeni Dhar Construction ha East Jaiñtia Hills ha ka HNLC ka seng kaba la shah kheiñ beaiñ.
“Nga tharai ba ka HNLC ka la dep wan ban ïapynbeit hynrei kyndit kynsan ki la weng noh. Nga tharai ba kane ka dei ka jingbymler jong ka Sorkar,” la ong u Bah Pala.
U Bah Pala u la ban jur ba ka jingbym lah jong ka Sorkar ban weng ïa ki jingdawa jong ka HNLC ka la wanrah ïa ka jingthud noh ha ka jingïakren ïasuk.
“Lada ki (HNLC) ki lah ban hiar thma ha ka jaka jong u Symbud Myntri Rangbah ka Jylla, kaei ka ban jia ïa u paidbah ba rit ba ria? Mutdur ma phi. Kumta, kane ka dei ka jingbymler jong ka Sorkar,” u la bynrap.
Haba shim ïa ka jingkitkhlieh halor ka jingpynbthei bom IED ha ka shnong Shymplong jong ka East Jaiñtia Hills ha ka 15 tarik u Nohprah 2025, ka HNLC ka la kynnoh ba ka pynlong sohpdung ïa ka nongkynti kaba long trai da u Symbud Myntri Rangbah Bah Sniawbhalang Dhar namar ka jingkynnoh ba u khlem siew ïa ka pisa ba dawa ka seng.
Haba pan jingkynthoh na u halor ka jingdawa jong ka HNLC, u Bah Pala u la kyrshan ïa ka jingïakren, da kaba ong, “Ka Sorkar ka dei ban rung ha kano-kano ka jait jingïakren ha ka jaka jong ka jingïaum snam. Nga ju kyrshan ïa ka jingïakren. Ki dei ban ïashim bynta ha ka jingïakren.”
U Bah Pala u la kdew ïa ki nuksa jong ki jingïakren ïasuk kiba jop, kum ka Nagaland bad ka ULFA, bad u la ban jur ïa ka jingdonkam jong ka jingïakren ha kaba pynbeit ïa ki jingïakynad.
“Ngi im ha ka spah snem kaba 21, kumta ngi donkam ban ïakren bad kano-kano ka bynta jong ki paidbah, kiba sngew ba kim sngewbha bad baroh,” u la ong.
