Nongpoh, K’Lyngkot 07
U President jong ka Ri Bhoi Tourism and Environmental Developmental Forum (RBTEDF) Bah Plielad Tiewsoh u la mih shakhmat ban maham tyngeh ïa ki katto katne ki ‘riew paidbah kiba ju mlien ban pynjot dusmon ïa ki khlaw ki btap bad ki doh um dohwah kumba la ju sakhi na ka por sha ka por khamtam ha kine ki bnai tyrkhong ki ban sa wan.
U Bah Plielad u la ong ba ka long shisha kaba sngewkhia shikatdei ban ïohi ba ki don bun ki briew ki bym don jingpyrkhat na ka bynta ka mei mariang, da kaba thang kulmar ïa ki khlaw ki btap, ka jingpynïap dusmon ïa ki mrad ki mreng bad ruh ki doh um dohwah lyngba ka jingber dawai bih.
Utei u nongïalam u la kyntu ïa ki nongïalam Hima, ki Raid, ki nongïalam shnong bad ki paidbah hi baroh ba kin ai ïa ka jingïatreilang bad ka Forum ban ïakhun halor kane ka mat kaba wanrah jingjot ïa ka mei mariang bad buh jingeh ïa ki pateng ban sa wan da kaba ai jingujor beit sha ka tnad Wildlife lane sha ka tnad Forest lada lap ïa kino-kino ki briew kiba leh pyrshah bad ba na ka liang ka Forum ruh kan nym map satia, hynrei kan leh da kaba tyngeh katkum ki kyndon aiñ.
