Shillong, K’Lyngkot 07
Ka AmritCem da ka jingthmu ban ai ka jingshakri ba khambha, kaba ïajan bad ki nongshong shnong ka Jylla kumjuh ban kyntiew ïa ki samla donsap ka la pynlong da ka Amrit Champion Hunt-Meghalaya bad kaba la poi sha ka phainal ha ka sngi Balang.
Ka AmritCem ha ka jingïatreilang bad ka Series-X ka la sdang ban pynïaid ïa ka Amrit Champion Hunt-Meghalaya naduh u bnai Risaw jong ka snem 2025 da kaba ki nongïashim bynta ki la shim bynta ha ka jingïakop rwai, jingïakop shad lyngba ka online.
Ha kane ka sngi ba pynlong ïa ka phainal (Live Grand Finale) jong baroh ki jait jingïakop ha State Convention Centre Shillong la wan ban long kongsan, ka Kong Brenda Pakyntein, Director of Tourism, kaba la ai mynsiem bad ai jingïaroh ïa ka AmritCem kaba la shim ïa kane ka bynta bad rynsan ban kyntiew ïa ki khun samla ba don sap jong ka Jylla.
Kumba 200 ngut ki khun samla shynrang bad kynthei kiba la ïashim bynta ha ki jingïakop lyngba ka online bad ha ka jingïakop shad la don arngut ki nongjop kata ka LDA Dance Group bad Sana Eliza Shympliang, katba ha ka jingïakop rwai ruh la don arngut ki nongjop ba kynthup u samla Kitkupar Nongsiej bad u Samla Franky Nongbri. Kine ki nongjop ki la ïoh ïa ka song pisa kaba long mar T.50 hajar ha ryngkat ki trophy.
Haba ïoh ban ïakren ïa u samla Kitkupar Nongsiej u ba long u nongjop ha ka jingïakop rwai u la pynpaw ïa ka jingsngewnguh bad ai khublei ïa ka AmritCem kaba la ai rynsan ïa ki khun samla bad ba u ïoh ban pynpaw pyrthei ïa ka sap ba u don.
Shuh-shuh u la phah ka khubor ai mynsiem ïa ki para samla kiba don sap ha ki bynta bapher-bapher ba kin pyndonkam hok ïa ka sap ba la ai kyrpang u Blei khnang ba ka pyrthei kan lah ïohi bad ithuh ïa ka sap ba ki don ba kan long ruh ka jingsah jingkynmaw ha ka jingim.
