Tehran, K’lyngkot:
Katkum ki khubor, la ong ba ka Iran ha ka Sngi Balang ka la sdien phasi ia uwei u suba nongsyntiat jong ka Israel. Ki khubor ka IRNA ki la pynithuh kyrteng ia utei u briew kum u Ali Ardestani, ha kaba la suba ba u ju phah jingtip sop-sop sha ki heh ka Mossad, ha kaba u ju ioh bujli pat da ki pisa ‘Crypto’.
Katkum ka kaiphod ba la pyllait da ka Iran, la iathuh ba utei u briew, u la phla ba u don bynta ha katei ka kam syntiat na bynta kitei ki heh ka Israel bad kumta ka Iran ruh khlem da pynslem ka la shim ia ka rai ban pynshitom ia u da kaba pynkut noh syndon ia ka jingim jong u.
Watla katta, ka IRNA kam shym la pynpaw pyrthei ia ka jaka bad ka por ba la set bad pynshong along ia u.
Ka kaiphod, ka iathuh ruh ba ka Israel, ka la thung kam ia U Ardestani, lyngba ka online, da kaba bynrap, ba ka mukotduma jongu, ka la iaid lyngba ki rukom treikam jong ka ain, ha ki iing bishar ba nyngkong bad ha ka iing bishar ba ha khlieh duh jong ka ri.
Ki sengbhalang kiba ïada ïa ka hok longbriew manbriew bad ki sorkar jong ki ri Sepngi ki la pynrem jur ïa ka jingpyndonkam jong ka Iran ïa ka jingpynshitom ïap, khamtam eh na ka bynta ki kam runar kiba ïadei bad ka saiñ hima sima bad ka kam sngap jar. Ki nongïa-khih ki kynthoh ba bun na ki jingshah pynrem ki shaniah ha ki jingphla pop ba la pynbor, bad ba ki jingbishar bunsien ki ju long ha lyndet ki jingkhang ba la khang, khlem da ïoh ïa ka jingïarap aiñ kaba laitluid.
Hynrei ka Tehran ka pynskhem ba kito kiba la shah pyniap ki dei ki “nongtreikam jong ki tnad wad bniah kiba pyrshah” kiba donkti ha ki kam lehnoh ne pynjot. Ki heh sorkar Iran ki la kynnoh ba ka Israel ka la pynlong ïa ka jingïakhih ban thombor rieh hapoh ka Iran, kynthup ïa ki jingpynïap ïa ki stad nuclear bad ka jingpynjot ïa ki jaka treikam ba kongsan.
La tip ba ka Tehran, ka la pyniap ia 12ngut ki briew, namar ka kam syntiat, naduh ka thma liengsuin, ha u bnai Jylliew, kaba ka Israel, ka la ialeh pyrshah ia ka Iran, ha kaba la pyniap ia jan 1,100ngut ki briew, ba kynthup ia ki heh shipai bad ki riewstad nuclear. Ha ka jingsiew kylliang, ka jingbthei namding jong ka Iran ka la pyniap ia 28ngut ha Israel.
Ka jingïakren ka la pynlong ïa baroh arliang mamla ban long kiba husiar bha bad ka la pynjur shuh shuh ïa ka jingïakynad ha kylleng ka thaiñ.
